– Aldyńǵy jyldary osy jerde talqylanǵan usynystar men ıdeıalar Qazaqstanǵa jahandyq syn-qaterlerdi ýaqtyly eskerip, qıyndyqtardy tabysty eńserýge múmkindik berdi. Damýdyń qazaqstandyq modeli qalyptasqan jaǵdaılar men boljamdarǵa qaramastan óziniń turaqtylyǵy men tıimdiligin dáleldegenin bilesizder. Biz órshil maqsattar qoıyp, solarǵa qol jetkize aldyq, – dedi Nursultan Nazarbaev.
Plenarlyq otyrys barysynda Elbasy jahandyq ekonomıkadaǵy sońǵy ózgerister týraly pikirin ortaǵa salyp, memleketaralyq dıalogty jaqsartý úshin birqatar ıdeıa usyndy.
Qazaqstannyń Tuńǵysh Prezıdenti sóılegen sózinde álemdik ekonomıkany damytý, sıfrlandyrý, bilim berý úderisteriniń transformasııasy, adam kapıtalyna qoıylatyn talaptardyń kúsheıýi, sondaı-aq ýrbanızasııa perspektıvalary sııaqty máselelerge toqtaldy.
– Ekonomıkalyq josparlaýdyń kókjıegi tarylyp kele jatqanyn bilesizder. Kúrdeli jaǵdaılardan shyǵý joldaryn Birikken Ulttar uıymy, G-20, Dúnıejúzilik saýda uıymy sııaqty halyqaralyq uıymdar men forýmdar aıasynda tabýǵa bolady. Birlese talqylaý men basqarýǵa kóshetin kez keldi. Taıaýda Beıjińde ótken «Bir beldeý, bir jol» II forýmynda men «Úsh D» jańa geosaıası ahýaly negizinde turaqty jahandyq arhıtektýrany qalyptastyrýdy usyndym. Bul degenimiz – úsh deńgeıde dıalog ornatý, – dedi Nursultan Nazarbaev.
Sonymen qatar, Elbasy Astana ekonomıkalyq forýmy alańynda halyqaralyq dıalog formatyn keńeıtý úshin sharalar qabyldaýdy usyndy.
– Osy jerde aıtylǵan ıdeıalar álemdik saıasat pen ekonomıkanyń eń kúrdeli jáne ózekti máselelerine qatysty sheshimder tabýǵa septigin tıgizetinine senimdimin, – dedi Qazaqstannyń Tuńǵysh Prezıdenti.