Memleket basshysy oblys ortalyǵyndaǵy sý jańa Jastar saraıyna keldi. Munda eki kúnnen beri kórshi el – Reseı men Qazaqstannyń volonter jastary men qoǵamdyq uıymdar ókilderiniń qatysýymen «Volonterlik – jastardyń áleýmettik lıfti» atty Qazaqstan-Reseı jastar forýmy ótip jatqan. Forýmda volonter jastar Qazaqstan Prezıdenti aldynda ózderiniń úzdik jobalarynyń tusaýkeserin jasady jáne usynystaryn aıtty. Olardyń árqaısysynan ıgilik pen izgiliktiń, qaıyrymdylyq pen meıirimdiliktiń shapaǵaty nur shashyp turǵandaı. Mıkrofondy birinshi bolyp alǵan Reseı volonterlik ortalyqtary qaýymdastyǵy keńesiniń tóraǵasy Artem Metelev Reseıdegi úlgi bolar jaqsy ister týraly aıtty.
Mysaly, medık-volonterlik qozǵalysy sonyń eń jarqyn kórinisi deýge bolady. Reseıdegi 24 myń bolashaq dáriger bolatyn jas mamandar aýrýhanalarǵa baryp, medbıkelerge 2,5 mıllıon saǵat kómek kórsetti. Olar profılaktıkalyq aksııa júrgizip, donor bolady nemese selolarǵa baryp, dáriger joq jerlerde turǵyndarǵa dárigerlik kómek kórsetedi. Bul joba ıeleri «Qazaqstan medısına jastary» qoǵamdyq uıymymen kelisimge qol qoıdy. Endi olar Qazaqstannan óziniń ofısin ashqysy keledi. A.Metelev medısınany tańdaǵan qazaqstandyq jastardy óz otandastarynyń osy bastamasyn qoldaýǵa shaqyrdy. Sonymen qatar ekologııalyq «Taza oıyn», qaıyrymdylyqqa shaqyrǵan «Menimen birge armanda», «Qaıyrymdy saıahat» jobalary týraly da áńgime qozǵady.
Qazaqstandaǵy volonterler jelisin basqaratyn Vera Kım elimizdegi volonterlik istiń damýyn elordamyzdyń tarıhymen baılanystyrdy.
– Arqa tórinde elordamyz ornyqty, onda Azıada, EKSPO sııaqty halyqaralyq iri sharalar ótetin boldy. Mine, osyǵan oraı tutas volonterler pýly qalyptasty. Qazaqstandaǵy volonterlik qozǵalys memlekettiń qoldaýymen óris alǵanyn aıtýǵa tıispin. 2016 jyly Volonterlik týraly zań qabyldandy, ony jasaýǵa volonterlerdiń ózi atsalysty. Men ózim sol zańdy jasaý satylarynyń basy-qasynda bolǵan jumysshy tobynyń múshesimin. Qazir Qazaqstanda 200-den asa volonterlik uıym belsendi jumys isteıdi. Volonterliktiń áleýmettik, tótenshe oqıǵaly, janýarlarmen jumys jáne etno, medısınalyq baǵyttary tez damyp keledi. Qazaqstanda qazir ulttyq volonterlik jeli jumys isteıdi. Respýblıkalyq «Jeńis» jobasy osy jeliniń bet-beınesi bolyp sanalady. Osy zalda otyrǵandardyń kópshiligi de «Jeńis» jobasynyń volonterleri. Uly Otan soǵysynyń 5 myńnan astam qatysýshysy men tyl ardagerine kómek kórsetildi, – dedi V.Kım. Elimizdegi munan basqa da júrekti eljireter volonterlik ıgi isterdi baıandaǵan ol sóziniń sońynda 2020 jyldy Volonterler jyly dep jarııalaýdy usyndy.
Sonymen qatar Reseıdiń «Pobeda» volonterler qoǵamdyq qozǵalysy ortalyq shtabynyń tóraıymy Olga Omelchenkova adamzatqa zor qasiret ákelgen Uly Jeńiske 75 jyl tolatyn 2020 jyly ár eldiń volonterlerin úlken halyqaralyq bir komandaǵa birigýdi usyndy.–Bul forýmda qazaqstandyq volonterler bizdiń osy jobamyzdy qoldaıtyndyqtaryn bildirdi. Endi ony Qazaqstan basshylyǵy da qoldasa degen úmitimiz bar, – dedi O.Omelchenkova.
Reseılik jáne qazaqstandyq volonterlerdiń tamasha isterin tyńdaǵannan keıin sózdi Memleket basshysy Qasym-Jomart Toqaev aldy.
– Men dostyq saltanat qurǵan osy zalda jarqyn kóńildi, ózara túsinisken, ıgi maqsattar jolynda birge bolýdy qalaǵan jastardy kórgenime qýanyshtymyn! Aıtpaqshy, men Birikken Ulttar Uıymynda qyzmette bolǵanda halyqaralyq volonterlerdi qoldaǵan edim. Men sizderdiń «2020 jyldy Volonterlik qozǵalys jyly bolsyn» degen túıindi, tujyrymdy usynystaryńyzdy qoldaımyn! – dedi Qasym-Jomart Kemeluly. Prezıdent volonterlik appaq júrekten shyqqan jaqsy nıetterdiń jarshysy, shynaıy patrıottyq sezimniń, elge qyzmet etýdiń úlgisi ekenin aıtty. Volonterlik qozǵalyspen birge jaqsylyqtar, ıgi ister erip júredi. Volonterlik árbir jasty jaqsy iske, armanǵa talpyndyrady, al olar jasaǵan ıgilikter árkimniń óz tabysynyń tarıhyna aınalady.Munan keıin Prezıdent Qasym-Jomart Toqaev elimizdegi jastar saıasaty jóninde memleket atqaryp otyrǵan isterge toqtaldy.
– Memlekettik organdar meniń tapsyrmam boıynsha jastardyń bilim alýyn, kásiptik mamandyqtardy meńgerýin, jumysqa ornalasýy men sapaly demalysyn kúndelikti qadaǵalap, tekseretin bolady. «Jas kásipker» bıznes-bastamalar baǵdarlamasyn, startap jobalardy qoldaıdy, jumysy, bilimi joq jastardyń máseleleri sheshimin tabady. Biz eń aldymen jumysy, kásibi, eńbek tájirıbesi joq jastardy jumysqa ornalastyratyn arnaıy baǵdarlama júrgizemiz. Biz «Dıplommen – aýylǵa!», «Serpin» baǵdarlamalary sheńberinde bilikti jas mamandardy qoldaýdy kúsheıtemiz, – degen Qasym-Jomart Kemeluly volonterlerdi osyndaı memlekettiń aldynda turǵan áleýmettik máselelerdiń sheshimin tabýǵa belsene aralasýǵa shaqyrdy.
Memleket basshysy Úkimetke, ákimderge volonterlik qozǵalysty barynsha qoldaýǵa tapsyrma beretindigin de aıtty. Volonterlik aǵartý ortalyqtaryn ashýdy, saýatty aqparattyq saıasat jasaýdy, áleýmettik jelilerde volonterlik ınfraqurylym qurýdyń asa mańyzdylyǵyn atap kórsetti.
– Kóptegen azamattyq bastamalar, volonterlik áleýmettik jobalar áleýmettik jelilerde paıda bolady. Azamattyq ustanymy bekem, belsendi jandar áleýmettik mańyzdy jobalar usynady. Biz olarǵa barynsha kóńil bólip, qoldaý kórsetýimiz kerek, – dedi Qasym-Jomart Kemeluly. Prezıdent reseılik jastar ókili aıtqan Uly Jeńistiń 75 jyldyǵy qarsańynda halyqaralyq ekspedısııa qurý týraly bastamasyn qoldaıtyndyǵyn, sonymen qatar Almaty, Aqtóbe qalalaryndaǵy, Mańǵystaý oblysyndaǵy volonterlerdiń ıgi isterine rızashylyǵyn bildirdi.Qasym-Jomart Toqaev irgesi bólinbegen kórshi eki eldiń yntymaǵyn jastar jasaıtynyn kóldeneń tartty. Aldaǵy ýaqytta halyqaralyq «Jyl volonteri» syılyǵyn bekitýdi usyndy. Ol úzdik volonterlik bastamalar men jobalarǵa, kreatıvti isterge beriletin bolady. Ony talqylaý úshin eki eldiń úzdik volonterleri kiretin turaqty Volonterlik keńes qurylýy kerek.
Forým aldynda Qazaqstan Prezıdenti Qazaqstan men Reseı jastarynyń STARTUP-jobalarynyń kórmesin aralap, Qostanaı oblysy Jastarǵa qyzmet kórsetý ortalyǵynyń jumysymen tanysqan bolatyn.
Ken deseń de, dán deseń de aldymen aýyzǵa ilinetin Qostanaı sońǵy jyldary qaıta óńdeý ónerkásibimen qara úzip, ásirese mashına jasaý isinde Qazaqstanda kósh bastaǵany belgili.
Qostanaıǵa jumys saparymen kelgen Prezıdent Qasym-Jomart Toqaev aldymen oblys ortalyǵyndaǵy «SaryarqaAvtoProm» zaýytyna at basyn burǵan bolatyn. Memleket basshysy munda mashına qurastyrý kásipornynyń jumysymen tanysty. Bıyl «SaryarqaAvtoProm» avtozaýyty 38 mıllıonnan asa teńgeniń ónimin óndirdi. Jyldyń alǵashqy toqsanynda 5306 jeńil jáne júk mashınasyn, avtobýstardy sapqa qoıdy. Bul – ótken jylǵy osy ýaqytpen salystyrǵanda 1,8 ese kóp. Zaýyt basshylyǵy jyl aıaǵyna deıin 20000 jeńil jáne kommersııalyq mashınalar qurastyrýdy mejelep otyr. Endi Qostanaı avtozaýyty avtomobılderdi syrtqa burynǵydan úsh ese kóp shyǵarady. Bıyl avtomobılder Reseı men Tájikstan sııaqty Keden odaǵy elderine 30 paıyzǵa artyq satylatyn bolady. Sodan keıin Qazaqstan Prezıdenti shanaqtardy boıaıtyn ámbebap sehtyń jáne iri bólshekter arqyly qurastyrý ádisi boıynsha (DKD) avtomobılderdi serııasymen shyǵaratyn sehtyń jumystaryn kórdi.
Memleket basshysy Qazaqstannyń búginde álemdik sapa standartyna sáıkes zamanaýı joǵary tehnologııalyq ekonomıka quryp jatqanyn atap ótti. Sondaı sapa kórsetkishiniń biri qostanaılyq zaýyt shyǵaratyn brendti ónim JAC avtomobıli bolyp otyr. Osy markanyń 535 mashınasy sapqa qoıyldy. Brend jelisi «JAC T6 Pickup» dep atalatyn jeńil mashınanyń jańa modelimen jáne «JAC N H200» júk mashınasymen tolyǵa tústi. Qostanaıdan shyqqan avtobýstar elimizdiń avtobýs parkterin jańalaıdy. Qazirdiń ózinde 50 avtobýs Atyraýǵa ketse, jaqynda Shymkent qalasyna 300 avtobýs jiberiledi. Jalpy, zaýyttyń óndiristik qýaty – jylyna 28 myńnan astam avtomobıl. Kásiporyn qazirgi ýaqytta Ankai, MAN, JAC, HYUNDAI jáne Lovol avtomobıl markalaryn shyǵarady.
Sonymen qatar osy salada jumys isteıtin sheteldik ınvestorlar Qazaqstan Prezıdentine ózderiniń jobasyn tanystyrdy.
Memleket basshysy Qostanaı qalasyndaǵy jaqynda ǵana ashylǵan «iKomek» ortalyǵyna keldi. Bul elimizdegi Nur-Sultan qalasynan keıingi ekinshi qyzmet kórsetý ortalyǵy bolyp tabylady.
Memleket basshysyna «109 Call-ortalyǵy» biryńǵaı baılanys ortalyǵynyń jumysy jáne «Ashyq ákimdik» jobasynyń júzege asyrylý barysy jóninde málimet berildi.
Sonymen qatar Qazaqstan Prezıdenti monıtorıng jáne shuǵyl áreket etý ahýaldyq ortalyǵynyń jumysymen tanysty. Qasym-Jomart Toqaevtyń pikirinshe «iKomek» ortalyǵynyń tájirıbesin respýblıkanyń barlyq óńirine keńinen taratý qajet. Kezdesý sońynda Memleket basshysy elimizdiń áleýmettik-ekonomıkalyq jáne mádenı damý salasyna qosqan úlesi úshin «Mılh» JShS-niń dırektory Sergeı Blokty, Rýdnyı qalasy aýrýhanasynyń bas dárigeri Talǵat Qaıkenovti, «Alıýmınstroı» JShS-niń dırektory Abaı Muqanovty, «GRIN» Qostanaı oblysy azamattyq alıansy» qoǵamdyq qorynyń tóraıymy Dınara О́tebaevany jáne bilim berý salasynyń ardageri Stanıslav Shegelskaıany alǵys hattarmen marapattady.Qostanaıǵa saparynyń sońynda Memleket basshysy Qostanaı aýdanyndaǵy «Olja Sadchıkovskoe» jaýapkershiligi shekteýli seriktestigine baryp, óndiristik kórsetkishterimen tanysty.
Qazaqstan Prezıdentine aýyl sharýashylyǵy ónimderin qaıta óńdeý barysynda analıtıkalyq jáne sıfrly júıeniń qoldanylý múmkindikteri kórsetildi.
Kásiporyn Qostanaı oblysynyń ishki suranysyn jáne elimizdiń ózge óńirlerin sút ónimderimen qamtamasyz etedi. Prezıdent onda aýyl sharýashylyǵy taýarlaryn óndirýshilermen kezdesip, áńgimelesti. Dıqandar aýyl sharýashylyǵyndaǵy jetistikterdi tilge tıek etti. Sonymen qatar problemalardy da ortaǵa saldy. Belgili dıqan, kásipker Oleg Danılenko kóktemde beriletin kredıttiń qaıtarý merzimi óte tyǵyzdyǵyn aıtty. Memleket basshysy elimizdiń azyq-túlik qaýipsizdigin qamtamasyz etýge zor úles qosyp otyrǵan óńirdiń agrarlyq salasynyń damýyn joǵary baǵalady.
Úkimettiń kómegimen bul problemalardy sheshý jumystary kúsheıtiledi. Al jer máselesine keler bolsaq, kim jumys isteıdi, jer soǵan tıesili. Ekinshiden, jer sheteldikterge satylmaıdy. Bul – meniń Prezıdent retindegi túbegeıli ustanymym, – dedi Memleket basshysy.
Kezdesýge qatysýshylar aýyl sharýashylyǵy eńbekkerlerine memleket tarapynan kórsetilip jatqan qoldaý úshin Qasym-Jomart Toqaevqa alǵys aıtty. QOSTANAI