Azamattyq qorǵanys organdarynyń qyzmetkerleri aldyn alý jumystaryn júrgizip jatyr, qala aımaǵyndaǵy barlyq 15 sý qoımasy tekserildi. Tek úsheýi ǵana júzýge jaramdy dep tanyldy, qalǵandary ómirge qaýipti. Qalanyń TJD-niń azamattyq qorǵanys basqarmasynyń aǵa ofıseri Eldor Raımbekovtyń málimeti boıynsha Nura-Esil arnasy, Esil ózeniniń aǵyny, sonymen qatar Aqbulaq jáne Sarybulaq ózenderiniń aǵyny júzýge jaramsyz. Qaladaǵy sý burqaqtary da júzýge arnalmaǵan. Redısson qonaq úıiniń mańyndaǵy ortalyq qalalyq jaǵajaıda, sonymen qatar «Trı peskarıa» jáne «Kúıgen Jar» demalys oryndarynda ǵana shomylýǵa ruqsat etilgen.
«Ruqsat etilmegen jerlerge biz tyıym belgilerin, aqparattyq stendter ornatamyz. Statıstıka boıynsha bizde qaıǵyly jaǵdaılar dál osy shomylýǵa ruqsat etilmegen jerlerde tirkeledi», dedi Eldor Raımbekov.
Balalardyń qatysýymen bolatyn qaıǵyly jaǵdaılardyń sanyn azaıtý úshin jazǵy demalystyń aldynda qalanyń barlyq mektepterinde qutqarýshylar jattyǵý-sabaqtar men dárister ótkizedi.
«Tek qana ruqsat etilgen oryndarda júzińizdi, sý qoımalarynyń janynda balalaryńyzdy qaraýsyz qaldyrmaýyńyzdy, sý qoımalarynyń mańynda demalǵan kezde spırttik ishimdikterdi qoldanbaýyńyzdy, sonymen qatar, balyqshylardan balyq aýlaý kezinde qutqarý jıletin kııýlerin suraımyz», dep qorytyndylady E.Raımbekov.