Almatyda sońǵy úsh jyl ishinde 700 myńǵa jýyq qalalyqtar turatyn 1487 aýla jóndeldi jáne abattandyryldy. Bıylǵy jyly qalanyń kópqabatty úıleriniń 72% qamtıtyn taǵy 638 aýlany rekonstrýksııalaý josparlanǵan.
Jańarǵan aýlalarda jańa balalar jáne sport alańdary, balalardyń sportpen aınalysýy úshin trenajerler men oıyn keshenderi paıda bolýda. «Qaýipsiz qala» baǵdarlamasy boıynsha jaryqtyń jańa dińgekteri men vıdeokameralar ornatylýda.
«Men ózim osyndaı aýlada óstim, alǵa qoıǵan mindetim - qarapaıym jandarǵa jaqsy jaǵdaı jasaý. Eki jyl ishinde biz adamdardyń kóshege shyǵýy, balalardyń syrtta oınaýy, eresek jandardyń ózara aralasýy, qonaqqa barýy úshin Almatynyń barlyq aýlalaryn 100% jóndeımiz. Sonda ǵana meniń aýlam men meniń qalam ekenin sezinýge bolady. «Qala adamdar úshin» konsepsııasynyń basty máni osynda», dep atap ótti Baýyrjan Baıbek Aqsaı-4 yqsham aýdan turǵyndarymen kezdesý barysynda.
Bıylǵy jyly qalanyń 14 yqsham aýdandarynda 456 kóshe salynýda jáne 140-tan astam kóshege ortasha jóndeý jumystary júrgizilýde. Qalanyń shet aımaqtaryndaǵy birqatar parkter, skverler men júrginshi aımaqtary abattandyrylady. Qala keńistiginiń qaýipsizdigi úshin 120-dan astam kóshege jańa LED shamdary ornatylǵan.