Eńbek qaýipsizdigi eskeriletin boldy

Kásipodaqtar federasııasynan prezıdenttikke kandıdat bolǵan Amankeldi Taspıhov saı­laý ashyq, jarııaly ótti dep esepteıdi. «Barlyq jerde bizdiń baıqaýshylarymyz boldy. Zań buzýshylyqty baıqaǵan joqpyz. Eshqandaı aryz tús­ken joq. Qazaqstandyqtar t­uraq­tylyqqa, yntymaqqa kó­bi­rek bet buryp, soǵan daýys berdi», degen Amankeldi Tas­pı­hov osyǵan deıingi óz ún­deý­lerinde eńbekkerlerdiń máselesine baılanysty naqty usynystaryn aıtqanyn jetkizdi. Kásipodaqtar federasııasynyń tóraǵasy Baqytjan Ábdiraıym bul usynystardyń oryndala bastaǵanyn aıtty, baǵdar­lamadaǵy túıtkildi máselelerdi sheshý boıynsha jumys jalǵasa beretinin atap ótti. 

«114 jyl tarıhy bar ká­sip­odaq tuńǵysh ret óziniń úmit­ke­rin Prezıdent saılaýyna usyn­dy. Biz usynǵan úmitkerdiń baǵ­dar­la­masynda jalaqyny, tabysty kó­terý, áleýmettik qorǵaý, ju­mys oryn­daryndaǵy qaýipsizdik máselesi bolǵanyn bilesizder. Pre­zıdent Qasym-Jomart Toqaev úmitkerlerdiń usynystary boıyn­sha Úkimetke tapsyrma bergenin atap ótti. Bul halyq úshin úlken je­tistik. Jaqyn arada eńbek qa­ýipsizdigine baılanysty arnaıy baǵdarlama qabyldanǵaly jatyr. Kópten beri oryndalmaı kelgen Eńbek kodeksine ózgerister men tolyq­tyrýlar engizý Úkimetten Par­lamentke usynyldy. Ju­mys oryndaryndaǵy qaýip­siz­dikke baılanysty biz­diń qatysýymyzben arnaıy jumys toby qurylyp, ja­qyn­da Úkimet otyrysynda qaý­ly qabyldanbaqshy. Biz kóter­gen ózekti máselelerdi sheshý­diń joldaryn qarastyryp, j­u­mysty júrgize beremiz», dedi B.Ábdiraıym. 

Belgilengen baǵyttar ja­ńadan saılanǵan Qazaqstan Res­pýblıkasy Prezıdentiniń jańa jumys oryndaryn ashý, laıyqty eńbekaqy tóleýdi qam­tamasyz etý, sondaı-aq Mem­leket basshysynyń ulyqtaý rásimi barysynda aıtqan ádil áleýmettik saıasatty júrgizý bóli­gindegi bastamalarmen úndes. Basqosýda Bas keńes músheleri elimizde áleýmettik ádilettilikti nyǵaıtý, eńbek jaǵdaılaryn jáne eńbekti qorǵaýdy jaqsartý, ón­diristegi jazataıym oqıǵalardyń aldyn alý, qyzmetkerlerdiń sala­matty jáne qaýipsiz eńbek jaǵ­daılaryn jasaýǵa jumys be­rýshilerdiń qyzyǵýshylyǵyn art­­tyrý, korporatıvtik áleý­met­tik jaýapkershilikti damytý, qyz­metkerlerdiń eńbekti qorǵaýǵa ke­ńinen qatysýyn qam­tamasyz etý jáne barlyq kásiporyndar men uıymdarda qoǵamdyq baqylaý ıns­tıtýtyn damytý jónindegi bastamalardy iske asyrýdy jal­ǵastyrýǵa nıet bildirdi.