Úsh kúnge sozylǵan halyqaralyq jaıdarman festıvali arnaıy baǵdarlamalyq jospar negizinde júzege asty. Festıvaldiń alǵashqy kúni shet eldiń jastary men qazaqstandyq toptardy tabystyrý maqsatynda ashylý saltanaty ótti. Jastar saraıynyń tórinde belgili jaıdarmanshylardyń júrgizýimen konserttik baǵdarlama qoıyldy. Sondaı-aq, festıvaldiń ekinshi kúni sheteldik qatysýshylar úshin Nur-Sultan qalasyna arnaıy ekskýrsııa uıymdastyryldy. Qala ishinde ornalasqan záýlim ǵımarattar men murajaılardy, «Báıterek» pen «EKSPO» keshenderin jáne teatrlardy aralatty. Shara barysynda qonaqtarǵa qazaq eliniń tarıhy baıandalyp, salt-dástúrleri jaıly málimetter aıtyldy.
Festıvaldiń úshinshi kúni qatysýshy túrki tildes memleketterden kelgen komandalar men qazaqstandyq toptar arasynda jaıdarman saıysy uıymdastyryldy. Beıbitshilik jáne kelisim saraıynda ótken dodaǵa barlyǵy 10 komanda qatysty. Onyń 6 sheteldik, 4 qazaqstandyq top. «Qazaqstan halqy assambleıasynyń quramasy» (Nur-Sultan qalasy), «Baıan ólke» quramasy (Mońǵolııa), «Biz qazaqpyz» komandasy (Ekibastuz qalasy), «Qaraqalpaqstan quramasy» (О́zbekstan Respýblıkasy, Nókis qalasy), «Bashqurtstan quramasy» (Reseı Federasııasy, Ýfa qalasy), «Noǵaı quramasy - Altyn orda» (Reseı Federasııasy, Noǵaı aýdany), «Búgin.kz» (Shymkent qalasy), «Tatarstan quramasy» (Reseı Federasııasy, Qazan qalasy), «Mıllıon» - «Nur-Úmit» óner ortalyǵy (Shymkent qalasy), «Pozıtıff» (Qyrǵyzstan Respýblıkasy, Bishkek qalasy) komandalary óz Otandarynyń namysyn qorǵady.
О́ner kórsetken komandalarǵa qazylar tıisti upaı sandaryn úlestirip, jeńimpazdardy anyqtady. Qazylar alqasynyń ádil sheshimimen «Baıan ólke», «Qaraqalpaqstan», «Bashqurtstan» qurama komandalary III orynǵa laıyq dep tanylyp, 150 myń teńge kólemindegi qarjylaı syılyqqa ıe boldy. Júldeli II oryn ıegerleri úshin 300 myń teńge aqshalaı syılyq berildi, bul tuǵyrǵa «Búgin.kz» jáne «Pozıtıff» komanadalary kóterildi. Úsh kúnge sozylǵan halyqaralyq ázil festıvaliniń jeńimpazy «Noǵaı quramasy - Altyn orda» komandasy atandy. I oryndy ıelengen Noǵaı aýdanynyń namysyn qorǵaǵan jastarǵa 1 mıllıon teńge kólemindegi aqshalaı syılyq berildi.
«Úzdik oıynshy» atalymyna «Tatarstan quramasynyń» oıynshysy – Naıl Salaxov laıyq dep tanyldy.
Ásem TAŃATAR
EUÝ-diń jýrnalıstıka fakýlteti stýdenti