Desek te, qala syrtynda ornalasqan Ushaqtar kentiniń problemalary da jeterlik. Aýyz sý men elektr energııasynyń joqtyǵyna mine, onshaqty jyldyń júzi bolypty. On jyldan beri qarańǵylyqta otyrǵan halyqtyń zaryn tyńdaýǵa Semeı qalasynyń ákimi Ermak Sálimov bul joly ózi arnaıy bardy. «Sý joq, jaryq joq qalaı ómir súrmekpiz» dep nazalandy ákimdi kórgen halyq.
-Qala ákiminiń eńbegin joqqa shyǵarǵymyz kelmeıdi, sizder jańa mektep salyp berdińizder, oǵan úlken rahmet,-dedi Ushaqtar kentiniń turǵyny Selıha Qalıeva,-biraq, oılańyzdarshy ózderińiz, jańa tehnologııaly mektepti saldyńyzdar. Qalanyń ortalyǵynda mundaı mektep joq, dep maqtana alamyz. Mekteptiń ozyq tapsyrmalaryn oryndaý úshin balalarymyz, nemerelerimiz úıge keledi. Kelse «svet»joq! Kompıýter qosa almaıdy. Tústen keıin oqıtyndarǵa tipti qıyn. Qysta qarańǵyda qaıtady. Kelse jaryq joq. Qysta tań kesh atady. Úlgermeıdi sabaq qarap, kiımderin jınap, shashtaryn tarap. Mine, osydan keıin sizder, bala nege nashar oqıdy deısizder?! Sý taǵy joq. Jaqynda ǵana birneshe úı birigip, óz kúshimizben sý kirgizgendeı boldyq. Qalǵan úıler tosyp otyr. Qubyrlar bar. Biraq, olar bizden shetkeri tusta, Iýnost aýdany tusynda ǵana tur.
Turǵyndarmen kezdesýge kelgen «SMF Mehkolonna №59» JShS Bas dırektory Petr Radenkov áleýmettik ınfraqurylymdyq máseleler boıynsha kelisimshart tez arada jasalsa, problemalar qarasha aıyna deıin sheshilip qalatyndyǵyn, qurylys juystaryna kem degende bes-alty aı qajettigin aıtty. P. Radenkov qala basshysy Ermak Sálimov ózi tikeleı kelip, elmen júzdesip otyrǵandyqtan da problemalaryńyz bul joly nazardan tys qalmaıdy dep sendirdi.
Qala ákimi Ermak Sálimov bolsa, bıýdjetten turǵyndardyń áleýmettik jaǵdaıyn jóndeý úshin qarajat qarastyrylǵandyǵyn aıtyp ótti. Turǵyndardyń taǵy bir renishteri, avtobýs qatynasy nashar. Bekitilgen bir-eki avtobýs aıaldamaǵa jetpeı, bulardy syrt aınalyp kete barady eken. Sodan balalar mektepke jete almaıdy.
-Oqý jyly bastalysymen Semeıde qurastyrylyp, jańadan paılalanýǵa berilip jatqan avtobýstar sizderge de naqty jumys kestesimen júrip, keletin bolady,-dedi qala ákimi Ermak Sálimov,-qarasha aıynda sý men jaryq máselesi de ońtaıly sheshimin tabady dep senińizder.
Ákimniń ýádesin estigen halyq «tosqannan basqa amalymyz qaısy» desti. Kezdesýde taǵy da basqa kóptegen problemalar qozǵaldy.
Raýshan NUǴMANBEKOVA
SEMEI