Arys, biz birgemiz!

Elvıra SERIKQYZY – ALMATYDAN:

Nur Otan partııasy Almaty qala­lyq fılıalynyń uıymdastyrýymen jáne «Janý máseleleri ınstıtýty» RMK ujy­my­nyń qoldaýymen Arys qala­syn­daǵy zardap shekken turǵyndarǵa kómek berý maqsatynda Almatydaǵy kásiporyndar basshylary men mamandary jınaldy.

Kómek kórsetý sharasynda Nur Otan  par­tııasy Almaty qalalyq fılıaly tór­aǵasynyń orynbasary Arman Hal­bekov jáne «Janý máseleleri ınstıtýty» bas dırektory Tilek Ketegenov jáne basqa da qala belsendileri alystaǵy aǵaıyndy osynaý qıyn jaǵdaıda qoldaýǵa shaqyrdy.

Nur Otan partııasy Almaty qalalyq fılıaly tóraǵasynyń orynbasary Arman Halbekov atap ótkendeı, qazirgi kezde qala boıynsha 2 jedel qabyldaý pýnkti jumys isteýde. Almatylyqtar shama-sharqynsha azyq-túlik, kıim-keshek, turmys buıymdarymen kómektesýde. Eriktiler tarapynan barlyq ákelingen kómek boıynsha naqty tizim jasalyp, onyń tıisti mekenjaıǵa týra jetýi qam­tamasyz etilýde. Almatylyqtar eki kún ishinde Arystaǵy zardap shekken aǵa­ıyn­dar úshin 25 mln teńge jınaǵan.

Máslıhattaǵy partııa fraksııasynyń múshesi, kásipker Erbolat Qasymov 1 mln teńge aýdaryp, bir júk kóligimen armatýra jóneltken. Sondaı-aq Jetpisbaı Edigenov basqaratyn «Almaty aýyr mashına jasaý zaýyty» AQ, Vladımır Rybalko basshylyǵyndaǵy «Atacom» JShS tarapynan 1 mln teńgeden kómek kórsetildi. Eki kún ishinde 150 tonna qurylys materıaldary tıelgen 14 júk kóligi Arysqa attandy. Al «Magným» saýda ortalyǵy 3 mln teńgeniń azyq-túligimen kómektesti. Dál qazirgi jaǵdaıda almatylyqtar Arys turǵyndaryna barynsha qoldaý kórsetý maqsatynda jedel kómek amaldaryn qarastyrýda.

Baqytgúl BABASh – ATYRAÝDAN:

Atyraýlyq eriktiler Arystaǵy jaǵ­daıǵa alańdaýshylyq bildirip, kómek­tesýge nıetti. Qazaqstan halqy Assam­bleıasynyń kásipkerler Assosıa­sııasy ótkizgen jınalysta osyndaı bastama kóterildi. Munaıly aımaqtaǵy bıznes ókilderi, etnomádenı birlestikter men QHA «Jańǵyrý joly» jastar qoz­ǵalysynyń músheleri, stýdentter men eriktiler uıymdary Túrkistan obly­syndaǵy qıyn ahýalǵa janashyrlyq tanytyp, kómek qoldaryn sozýdy uıǵardy.

«Saraıshyq» JShS bas dırektory, Atyraý oblysy Qazaqstan halqy Assambleıasy «Jańǵyrý joly» jas­tar qozǵalysynyń jetekshisi Tamıla Rozmetova: «Arys qalasynyń turǵyn­daryna el bolyp qaraılasyp jatqa­nymyz – eldigimizdiń, birligimizdiń belgisi. Mundaı sátte biz de nemquraılylyq tanytpaı, arystyqtarmen birge ekenimizdi bildirgimiz keldi. Assambleıanyń Atyraý oblysyndaǵy fılıaly, etnomádenı birlestikter men kásipkerler, jastar aqshalaı-zattaı járdemdesip jatyr. «Jańǵyrý joly» jastar qozǵalysynyń oblystaǵy bólimshesiniń ózi qysqa ýaqyt ishinde 1 mıllıon teńgeden as­tam qarajat jınady. Jumys áli de jal­ǵasyn tabady», dedi.

Aıta keteıik, «Jańǵyrý joly» qozǵalysy «JAGSYLYQJASA» jobasy aıasynda Túrkistan oblysyna eriktiler jiberedi. Atyraý oblysynda joba bastalǵan bir kúnniń ózinde 20-dan astam erikti Arys turǵyndaryna kómek kórsetýge tilek bildirdi.

Temir QUSAIYN – AQTО́BEDEN:

Aqtóbe óńirinde «Arystyqtar, biz sizdermen birgemiz!» atty kómek berý men qoldaý aksııasy ońtústikten apat jónindegi sýyt habar jetisimen-aq bastalyp ketti. Sol kúni óńirdegi óndiristik kásiporyndar men ózge de eńbek ujymdary ózderiniń bir kúndik jalaqylaryn apattan zardap shekkenderge arnalǵan qaıyrymdylyq qoryna aýdarý jóninde sheshim qabyldady. Sondaı-aq oblysta Arys jurtshylyǵyna moraldyq jáne materıaldyq turǵydan qoldaý kórsetýdiń shuǵyl sharalary belgilendi.

Osy oraıda Arystaǵy apat zardaptaryn azaıtý jóninde arnaıy shtab qurylyp, onyń músheleri gýmanıtarlyq kómek berý isin júıeli jolǵa qoıýdy uıymdastyrdy. Bul jóninde alǵashqy kezekte atqarylǵan is-sharalar jóninde oblys ákiminiń birinshi orynbasary Rahat Sydyqov bylaı deıdi:

– Azyq-túlik túrleri tıelgen avto­kólik kerýeni kóp keshikpeı Aqtó­beden Arysqa attandy. Onyń jalpy salmaǵy 24 tonnany quraıdy. Aldaǵy ýaqytta Arys qalasy úlken qurylys alańyna aınalýǵa tıis. Aqtóbelikter Arystaǵy aǵa­ıyndarǵa jergilikti qurylys ındýs­trııasynyń ónimderin jetkizýdi josparlap otyr. Onyń ishinde tas, aǵash, qum, sement jáne ǵımarattardyń tóbesin jabýǵa arnalǵan asa zárý materıalda­r bar. Alǵashqy kezekte onyń somasy 20 mıl­lıon teńge kóleminde belgilendi. Kómek berý aksııasynyń ekinshi keze­ńin­de onyń mólsheri taǵy da ósetin bolady.

Arystaǵy apat mektep oqýshy­lary­nyń jazǵy demalys kezinde oryn alǵany málim. Osyǵan oraı Aqtóbedegi atqarýshy bılik ókilderi 100 arystyq jas órendi oblys aýmaǵyndaǵy demalys pen tynyǵý lagerlerinde tegin demaldyrý jóninde sheshim qabyldady.

Názıra JÁRIMBET – QOSTANAIDAN:

Oılamaǵan jerden bolǵan apattan Arys qalasynyń jurty azap shegip otyrǵanda Qostanaıdaǵy aǵaıynnyń da júregi syzdady. «Apat aıtyp kelmeıdi» degen, onyń zardaby da, shyǵyny da zor bolyp tur. Apat bolǵan kúni túske deıin-aq Nur Otan partııasy Qostanaı oblystyq fılıalynyń tóraǵasy, aımaq ákimi Arhımed Muhambetovtyń basshylyq etýimen arnaıy jedel shtaby qurylǵan edi, onda «jedel jeli» telefony jumys isteı bastady.

– Jaısyz habar jetkennen-aq Tobyl óńiriniń jurtshylyǵy qınalǵan aǵaıynǵa qoldaý bildirip, qolushyn berýge asyqty. Olar jedel telefonǵa habarlasyp, kómek bergisi keletin usynystaryn aıtyp jatyr. Jekelegen adamdar Nur Otan partııasynyń fılıaly janynan qurylǵan arnaıy beketke bara alady. Syn sátte yntymaq tanytý mańyzdy, – deıdi Nur Otan partııasy oblystyq fılıaly tóraǵasy­nyń birinshi orynbasary Jańabaı Bısımbaev.

Arys qalasyndaǵy azamattarǵa kómek kórsetý maqsatynda 20 tonna un, 7 ton­na makaron men 3 tonna kondıterlik ónim­deri tıelgen avtokerýen jolǵa shyqty.

Nur Otan partııasynyń músheleri men mekeme qyzmetkerleri bir kún­dik jalaqysyn Arys turǵyndaryna kómek úshin arnaıy shotqa aýdardy. Qarjylaı kómek kórsetkenderdiń arasynda qostanaılyq bıznes ókilderi de bar. Mysaly, jergilikti kásipker, Nur Otan  partııasynyń múshesi Sergeı Blok jaǵdaıdy estigen boıda 1 mıllıon teńge, Nur Otan  partııasy Saıası keńesiniń múshesi, Qazaqstannyń Eńbek Eri Azamat Tursynov jáne ol basshy­lyq etetin «Qarasý» kompanııasynyń qyz­metkerleri 3,5 mıllıon teńge aýdardy. 20 tonnadan astam undy «Olja-Agro» jaýapkershiligi shekteýli seriktestigi arnaıy kólikke tıep jóneltti.

– «Olja-Agro» seriktestigi munymen shektelmeıdi, aptanyń sońyna deıin taǵy 40 tonna un jóneltetin bolamyz, – deıdi  sharýashylyq basshysy Aıdarbek Hodjanazarov. Nur Otan partııasy oblystyq fılıaly Jas Otan jastar qanatynyń belsendileri qabyldaý beketinde kúndiz-túni jumys isteıdi.

– Kóptegen qostanaılyqtar azyq-túlik, basqa da turmystyq birinshi qajetti kerek-jaraqtar ákeledi. Oblys­tyń qalalary men aýdandarynan, ká­sip­ker­lerden túsken azyq-túlikter beket basynda biraz júkke aınaldy, – deıdi jastar qanatynyń tóraǵasy Ádil Dıketaev.

Arystaǵy jaǵdaı turaqtalǵansha Qostanaıdaǵy kómek beketiniń jumysy jalǵasa beredi.

Hamıt ESAMAN – TARAZDAN:

Tótenshe jaǵdaıdan zardap shekken Arys qalasynyń turǵyndaryna jam­byldyqtar da óziniń kómegin kór­setti. Qazirgi ýaqytta jalpy quny 8 mıl­lıon teńgeden astam qarjy kólemin quraıtyn 40 tonna azyq-túlik júk kólikterine tıe­lip, Arys qalasyna jóneltildi. Naq­ty aıtqanda, kómek retinde 10 tonna un, 10 tonna qant, 18 myń dana qus jumyrt­qasy, 1,5 tonna taýyq eti, 350 kılogramm shujyq ónimderi, 1 tonna sút ónimderi, 200 kılogramm makaron ónimderi, 1 tonna ósimdik maıy, 400 kılogramm pechene, 700 kılogramm qııar jáne 1000 dana bólke nan daıyndalǵan.

Sonymen qatar 60 tonna qury­lys materıaldary da arystyqtarǵa kómek retinde jóneltildi. Jambyl oblysy ákimdiginiń habarlaýynsha, Arys qalasyna medısınalyq qyzmet kórsetý maqsatynda arnaıy 4 brıgada jiberilgen. Sondaı-aq 2,2 mıllıon teńge kóleminde qajetti dári-dármek bólingen. Al Arys qalasyndaǵy tótenshe jaǵdaı saldarynan 100-den astam adam Jambyl oblysyna kelip, tıisti oryndarǵa ornalasty. Jambyl oblysynyń ákimi Asqar Myrzahmetov arystyqtarmen kezdesip, olarǵa Áýlıeata óńirinen jan-jaqty kómek kórsetiletinin aıtty. Búgingi tańda azamattarǵa tıisti kómekter kórsetilýde. Aldaǵy ýaqyttarda tosyn apattan zardap shekkenderge Jambyl oblysy ákimdiginiń tarapynan 180 tonnadan asa gýmanıtarlyq kómek joldanatyn bolady. Sonymen qatar Tarazda Arys qalasyna kómek jóneltý boıynsha arnaıy beketter jumys istep tur.

Al qaıǵyly oqıǵa bolǵan kúni oń­tústik óńirdi betke alǵan jolaýshylar poıyzdary Taraz qalasynyń temir jol beketine ýaqytsha toqtatylǵan edi. Degenmen, óńir ákimdigi jolaýshylar úshin 8 «Ikarýs» markaly avtobýstardy daıyndap, 500-ge tarta jolaýshyny Shymkent jáne Qyzylorda baǵyttaryna shyǵaryp saldy.

Farıda BYQAI – PAVLODARDAN:

Oblystyq ákimdiktiń málimetin­she, qala jəne aýdan əkimdikteriniń qyz­metkerleri bir kúndik jalaqylaryn Arys qalasyndaǵy alapat jarylys­tan zardap shekken turǵyndaryna kómek retinde aýdardy. Memlekettik or­gandar qyzmetkerleri de judyryqtaı ju­mylyp, erikti túrde kómek qolyn soz­dy. Al oblystyq polısııa depar­ta­mentiniń habarlaýynsha, 2 myńǵa jýyq polıseı Arys turǵyndaryna bir kúndik eńbekaqylaryn aýdarǵan.

– Biz árqashan qıyn jaǵdaıda qalǵan qazaqstandyqtarǵa osylaı qoldaý kór­setýimiz qajet, – deıdi Jedel jasaq ıns­pektory Almaz Jantemirov.

Qazirgi tańda birneshe telefon nómirleri boıynsha Jedel jeli de qosýly. Oblys əkimdiginiń bastamasy boıynsha Arys qalasyna 100 tonna gýmanıtarlyq júk jóneltý sharasy jalǵasýda. Azyq-túlik taǵamdaryn, birinshi qajettilik taýarlaryn, jeke bas gıgıenasy zattaryn jınaý isine mesenattar, demeýshiler jəne óńirdiń qaıyrymdy turǵyndary atsalysyp jatyr. Oblys ákimi Bolat Baqaýov Arys qalasynyń 300 balasyn óńirdiń saýyq­tyrý lagerlerine qabyldaýǵa ázir ekenin jetkizdi. Sondaı-aq kómek qo­lyn sozýǵa asyqqan turǵyndar úshin oblys ortalyǵyndaǵy Krıvenko kó­shesi №25-úıdegi  Nur Otan partııasy ob­lys­tyq fılıalynyń ǵımaratynda shtab ornalasqan. Osy jerde Arys tur­ǵyn­daryna táýlik boıy jumys isteıtin kómek berý pýnkti ashyldy. Al ekinshi shtab Mamyr kóshesiniń №35-úıi mekenjaıynda Dostyq úıindegi Assambleıanyń oblystyq fılıalynda ornalasqan.

– Assambleıa fılıaly Arys qala­synda bolǵan apatty oqıǵa kezinde eva­kýasııalanǵan turǵyndarǵa gýma­nıtar­lyq kómek kórsetý úshin qabyldaý pýnktin uıymdastyrdy, – deıdi fınn-ýgor etnomádenı birlestiginiń basshysy Olga Nıkolashına. – Kez kelgen kómek qabyldanady. Biz Aryspen birgemiz!