Yqylastyń ósken ortasynda kúıshilik óner aıryqsha áspetteletin dástúrge aınalyp, dáýlesker kúıshilerdiń qalyń shoǵyry qalyptasqan. Táttimbet, Sary, Toqa, Daırabaı, Qyzdarbek, Itaıaq, Ábdı sııaqty kúıshilerdiń Yqylas biriniń dańqyn estip, kúıin qulaǵyna quıyp ósse, keıbiriniń kózin kórip, qadirles, syılas bolǵan. Bul ortada baǵzydan jetken teris buraý kúıleri ushtalyp, órisin uzartqan. Yqylas bolsa sol uly dástúrdi qobyz tilinde jalǵastyrýshy dáýlesker kúıshi. Qorqyt atadan keıin táńirlik aspapqa adamnyń tilin darytyp, joǵyn joqtatyp, muńyn muńdatqan birtýar kompozıtor.
Uıymdastyrýshylardyń aıtýynsha, keshtiń maqsaty – nasıhattalýy kemshin dástúrli mýzyka men onyń tanymal tulǵalarynyń biri - Yqylas Dúkenulynyń shyǵarmalaryn tyńdarman nazaryna usyný jáne ol týraly tyń derekterdi rýhanı aınalymǵa qosý.
Keshke belgili óner adamdary, mýzykatanýshy ǵalymdar, kúıshiler, ánshiler jáne Yqylas Dúkenulynyń urpaqtary qatysyp, Yqylas Dúkenulynyń shyǵarmalary tyńdarman nazaryna usynylmaq. Yqylas Dúkenuly týraly 1993 jyly «Qazaqtelefılm» túsirigen «Yqylas» atty derekti fılm kórsetiledi.
Al rýhanı keshti belgili ónertanýshy, kúıshi, "Shalqar" radıosynyń júrgizýshisi Sársenǵaly Júzbaı men ánshi, "Shalqar" radıosynyń júrgizýshisi Jasulan Naýryzbaıuly júrgizedi.
Yqylas tulǵasy rýhanı tarıhymyzdyń tórinen oryn alǵan. Ol - ataqty Qorqyt babadan keıingi qobyzǵa til bitirgen adam.
Qobyzdyń qudiretti únin túrlendirip qubyltqan Yqylas - ǵasyr únin ǵasyrlarǵa jetkizgen asqan kúıshi. Onyń «Aqqý», «Erden», «Qasqyr», «Jalǵyz aıaq», «Jez kıik» jáne taǵy basqa kúıleri - halyqtyń asyl murasy.
Kóneden jetken qobyz ónerin artynda qalǵan muragerleri jalǵastyryp keledi.