Poıma aýylynda ornalasqan «Terekti maı kombınaty» JShS maı óńdeý zaýytyn aralap kórgen depýtattar jergilikti kásiporyndardyń tynys-tirshiligimen tanysyp, mamandardyń oı-pikirine qulaq túrdi.
Maı óńdeý zaýytynyń dırektory Aqylbek Sarmalaevtyń aıtýynsha, kombınat ótken jyly 235,4 tonna maı men 422,15 tonna kúnjara óndirgen. Maıdyń 50 tonnasy О́zbekstanǵa eksporttalǵan eken.
- Zaýytta maımen qatar un da óndiremiz. Bizdiń tabıǵı ónimderimiz Reseı Federasııasynda suranysqa ıe. 6 jyl boıy un men kúnbaǵys maıyn Reseıdiń Samara, Orynbor, Saratov qalalaryna, О́zbekstan men Tájikstan elderine eksporttadyq. Tek shetelge taýar shyǵarǵanda qujat toltyrý máselesi qınaıdy. Ár vagonǵa ár túrli qujat kerek. Osyndaı qaǵazbastylyqtan aıyrylsaq, kásipkerliktiń damýyna úlken qoldaý bolar edi, - dedi Aqylbek Abzaluly.
Budan keıin depýtattar Aqsýat aýylyna kire beris joldy kúrdeli jóndep jatqan «TOBI» JShS-nyń jumysymen tanysty. Merdiger fırma bul salada jıyrma jylǵa taıaý eńbek etedi, JShS dırektorynyń orynbasary Asylanbek Rahmetovtiń aıtýynsha jumysqa esh kedergi joq. «Jobadaǵy 2443 metr joldy ýaqytynda jóndep, der kezinde tapsyramyz» deıdi A.Rahmetov.
- Terekti aýdany boıynsha joldyń 5%-y ǵana jaqsy, 47%-y – qanaǵattanarlyq deńgeıde. Al 48%-y óte nashar dep baǵalanady, - deıdi aýdan ákimi Ádil Jolamanov óńirdiń basty máseleleriniń birinen depýtattardy habardar etip.
Parlament depýtattary osy saparynda 1984 jyly salynyp, sodan beri jóndeý kórmegen mekteptiń jaǵdaıymen tanysty. Aýdan ortalyǵyndaǵy jańadan salynǵan 36 páterlik turǵyn úı, «Aq jelken» balabaqshasy men byltyr jóndeýden ótken aýdandyq aýrýhanany aralady. Turǵyndarmen kezdesip, olardyń keıbir suraqtaryna jaýap berdi.
Sýretti túsirgen Islamgúl ShALABAEVA
Batys Qazaqstan