«Slavıan bazary» XXVIII Halyqaralyq óner festıvali Vıtebskide shildeniń 11-15-i aralyǵynda ótti. Osydan tórt jyl buryn «Slavıan bazary-2015» halyqaralyq festıvalinde Dımash Qudaıbergen tuńǵysh ret gran-prıdi jeńip alsa, 2018 jyly Ernar Sadyrbaı birinshi júldege ıe bolǵan edi.
Bolgarııa, Izraıl, Qytaı syndy 15-ke jýyq memleketten jıylǵan ónerpazdardyń arasynan alǵa sýyrylyp shyqqan jerlesimiz Ádilhan Makın 2 týrda 178 upaı jınap, úzdik atandy. О́ziniń keń dıapazondy daýysymen, akterlik sheberligimen dúıim jurttyń jáne qazylar alqasynyń júregin jaýlap alǵan Ádilhan «Vıtebsk» teleradıokompanııasynyń tilshilerine bergen suhbatynda jeńisin Qazaqstandyqtarǵa, jastarǵa arnaıtynyn aıtty. Al, Reseı Federasııasynyń jáne Grýzııanyń halyq ártisi jáne «Slavıan bazary-2019» festıvaliniń qazylar alqasynyń múshesi Tamara Gverdsıtelı jerlesimizdiń boıyndaǵy talantyna súısinip, durys tańdaý jasalǵanyn atap ótti.
Ádilhan Petropavl qalasynda týǵan, osynda mektep bitirgen.