Polısııa qyzmetkerleri men jýrnalıster ár eriktige «Esirtkige jol joq!» jeıdesi men boıaýlar úlestirdi. Tártip saqshylary men volonterlerden, jýrnalısterden quralǵan top qalanyń shaǵyn aýdandaryn aralap, úılerdiń qabyrǵasyna jazylǵan esirtki jarnamasyn óshirdi. Aksııaǵa qatysýshylar jumysyn qala ortalyǵyndaǵy Maılın kóshesindegi 16 úıden bastady. Odan keıin 8-shi shaǵyn turǵyn aýdanynda ornalasqan № 16 jáne 17 úılerdi jarnamadan tazalady. Esirtki qylmysyna qarsy is-qımyl basqarmasynyń qyzmetkeri, polısııa maıory Aıgúl Erádilova qala turǵyndaryn osyndaı jazbalardy boıap, óshirip tastaýǵa shaqyrdy.
«Kóbinese jastar áýesqoılyqtan osy jazbalarǵa erip ketedi, sıntetıkalyq esirtkilerge tapsyrys berýdi usynatyn kúdikti mazmuny bar saıttardy tabady. Biz osyǵan qarsy kúresemiz, esirtki taratýshylardy anyqtaý jumystaryn júrgizemiz. Máselen, jaqynda ǵana avtobýs aıaldamasynda grafıttı (esirtkini jarnamalaý) salǵany úshin 2 jas jigit ustaldy, olar ákimshilik jaýapkershilikke tartyldy. Jyl basynan beri bul 30-shy aksııa» deıdi Aıgúl Erádilova.
Mundaı jazbalardy turǵyn úılerde, aıaldama pavılondarynda, garajdarda kezdestirýge bolady. Bir kún ishinde qatysýshylar osyndaı otyzdan astam mekenjaıdy boıady.
«Biz esirtkimen baılanysty qandaı da bir qylmystyń aldyn alýǵa qatysqanymyzǵa qýanyshtymyz. Bul biz úshin óte qyzyqty. О́ıtkeni bul jerde jastardyń ómirin basqa arnaǵa buryp jiberetin esirtkige qarsy óz erkimen kúresip júrgen jaqsy adamdarmen birge júretinińdi túsinesiń» dedi Qostanaı qalasyndaǵy №16 mekteptiń oqýshysy jáne «Jas sarbaz» aýla klýbynyń ókili Elızaveta Radıonova.
Sondaı-aq, tártip saqshylary sıntetıkalyq esirtkini satý faktilerin baıqasa ony jedel habarlaý kerektigin BAQ kómegi arqyly jurtshylyqtyń nazaryna saldy. Polısııa qyzmetkerleri habarlamany alǵannan keıin ony tekseredi jáne ol rastalǵan jaǵdaıda qylmystyq árekettiń jolyn kesý jóninde qajetti sharalar júrgizedi.
Qostanaı