«23 shildede shamamen saǵat 11.00-de «Ohotzooprom «О́B» RMQK Ortalyq óńirlik fılıalynyń ınspektorlary Aqmola oblysy Jarqaıyń aýdanynda tabıǵatty qorǵaý zańnamasyn buzǵandardyń aldyn alý sharasyn júrgizgen jáne kıik atý faktisin anyqtaǵan. Zań buzýshylardyń izine túskende 10 óńirge – Qostanaı oblysyna tıesili aq tústi «Nıva» markaly avtokólikten (memlekettik nómiri belgisiz) oq atylyp, eki ınspektor jaraqat aldy», - dep jazdy AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet.
Inspektorlardyń bireýiniń jaǵdaıy óte aýyr dep habarlanǵan edi. Baspasóz hatshysynyń málimetinshe, ınspektor oq jaraqatynan qaıtys boldy.
«Derjavınsk qalasynyń aýdandyq aýrýhanasyna jetkizilgen «Ohotzooprom «О́B» RMQK ınspektory oq jaraqatynan qaıtys boldy. Ekinshi ınspektorǵa sol aýrýhanada ota jasalyp jatyr», - dep jazdy QR AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet.
Aqmola oblysy Jarqaıyń aýdanynyń polısııa bólimi kúdiktilerdi izdep jatyr, olardy ustaý jospary jarııalandy.
Brakoner qolynan qaza tapqan «Ohotzoopromnyń» ınspektorynyń sońynda 4 balasy qaldy. Bul týraly elimizdiń Ekologııa, geologııa jáne tabıǵı resýrstar mınıstrligi habarlaıdy.
Qaza tapqan ınspektordyń aty-jóni – Qanysh Serikuly Nurtazınov. 1976 jyly 24 qańtarda dúnıege kelgen. Nurtazınov «Ohotzooprom» mekemesine 2016 jyly 5 qańtarda jumysqa alynǵan. Marqumnyń sońynda 3 qyzy men 2011 jylǵy bir er balasy jáne jubaıy qaldy. Qazirgi ýaqytta marqumnyń máıitin týǵan aýylyna jetkizý máseleleri talqylanyp jatyr.
Mınıstrliktiń habarlaýynsha, jaraqat alǵan ekinshi ınspektor Ospanov Samat Kóshbergenuly 1975 jyly Aqmola oblysynda týǵan. Bilimi ortasha arnaýly, zańger. Qazirgi tańda Samatqa Derjavınsk aýdandyq aýrýhanasynda operasııa jasalyp jatyr.