Federaldyq saýda komıssııasy (FTC) sondaı-aq Facebook dırektorlar Keńesinde qoldanýshylardyń jeke derekterin qorǵaýdy baqylaıtyn komıssııa qurýdy talap etip otyr. Táýelsiz sarapshylardan turatyn komıssııa kompanııa basshysy Mark Sýkerbergke baǵynbaıdy.
Facebook-ke salynǵan aıyppul sommasy tarıhta AQSh úkimeti qoldanýshylardyń jeke aqparatyn saqtaý erejelerin buzǵany úshin jaýapqa tartqan kez kelgen kompanııamen salystyrǵanda rekordtyq bolyp otyr.
О́tken jyly kompanııa Facebook áleýmettik jelisine tirkelgen qoldanýshylardyń jeke málimetterin zańsyz taratqany úshin daýǵa qalǵan edi. Qupııa málimetterge qol jetkizgen Cambridge Analytica saıası konsaltıngtik fırmasy derekterdi saıası naýqandarda qoldandy dep aıyptalǵan. Jalpy 87 mıllıonǵa jýyq akkaýnttyń jeke deregi taralǵan. AQSh tutynýshylardyń quqyǵyn qorǵaý bıýrosynyń tergeýine sáıkes, derekter onlaın-saýalnamalar arqyly zańsyz jınalyp, Cambridge Analytica-ǵa satylǵan.
Cambridge Analytica paıdalanýshylardyń qupııa derekterine qol jetkizgen jalǵyz fırma emes – odan ózge de uıymdar ruqsatsyz paıdalanǵan delingen.
Facebook basshysy Mark Sýkerberg óziniń málimdemesinde kompanııa qoldanýshylarynyń jeke málimetin qorǵaýdy kúsheıtetinin jetkizdi. «Fırma adamdardyń jeke basynyń qupııasyn saqtaýǵa jaýapty bolǵandyqtan, aldaǵy ýaqytta óz ónimderinde qupııa aqparat taramas úshin qoldanylatyn tehnıkalyq júıelerdi qaıta qarastyrady. Bul jumysty atqarý úshin júzdegen ınjener men myńnan astam adam jumyldyrylady dep kútemiz», dedi.