Qaraǵandy oblysyndaǵy Ulytaý aýdanynyń Bolatsaı degen jerinde 23-24 tamyz kúnderi «Rýhanı jańǵyrý» baǵdarlamasy boıynsha Jezkiik etno-mádenı mura festıvali ótedi.
Osymen ekinshi ret ótpekshi halyqaralyq mádenı sharaǵa elimizdiń belgili ártisterinen bólek Ispanııanyń Carmen Guerrero Flamenco ansambli, Serbııanyń ulttyq «Abrashevıch» orkestri, DUHAJ orkestri, Italııanyń MORESCA NOVA toby sııaqty sheteldik óner ujymdary da qatysady.
Festıvaldiń alǵashqy kúninde romantıkany jany súıetinder úshin alaý janynda konsert uıymdastyrylady. Sol kúni qonaqtarǵa «Qazaqfılm» men DAR Play stýdıosy túsirgen «Amire» fılminiń kórsetilimin usyný josparda bar.
Kelesi kúni festıval baǵdarlamasy «Atadan qalǵan asyl mura» atty konsertpen jalǵasady. Sondaı-aq, belgili aıtys aqyndary Amanjol Áltaev pen Sara Toqtamysova «Uly dala dúbiri» atty jyr saıysynda óner jarystyrady. Budan bólek, baǵdarlamaǵa saı qonaqtarǵa qazaq halqynyń tusaýkeser, besikke bóleý, betashar jáne basqa da salt-dástúr túrlerin kórsetý josparlanǵan.
Al Jezkiik etnofestıvaliniń sońǵy kúnin «Arlan» ulttyq dástúr teatry, estrada juldyzdary Qydyráli Bolmanov pen Qaraqat Ábildına, «Dos-Muqasan» ansambli, «Ulytaý» etno-rok toby, Alatauserileri, «Nazar» ujymdary, «Altyn batyr» step-toby qatysatyn gala-konsert túıindeıdi.
Qaraǵandy oblysy