Bilim kúninde Abaı Qunanbaıuly atyndaǵy №87 mektep-gımnazııasynyń ashylý rásimi ótti. Saltanatty sharaǵa Premer-Mınıstr Asqar Mamın, Bilim jáne ǵylym mınıstri Ashat Aımaǵambetov, Ekologııa, geologııa jáne tabıǵı resýrstar mınıstri Maǵzum Myrzaǵalıev, Nur-Sultan qalasynyń ákimi Altaı Kólginov, Qoǵamdyq mańyzdy bastamalardy damytý qorynyń basshysy Álııa Nazarbaeva qatysty.
Jıynda sóz alǵan A.Mamın aldymen barsha qazaqstandyqty jarqyn da aıtýly mereke – Bilim kúnimen quttyqtady. «Aldymyzdaǵy oqýshylar qadam basqan jańa mektepke Abaı Qunanbaıulynyń esimi berilip otyr. О́zderińiz biletindeı, kelesi jyly uly aqynymyzdyń týǵanyna 175 jyl tolady. Elbasy N.Nazarbaev sizderdiń ozyq bilim alyp, zamanaýı tehnologııalardy jappaı ıgerip, álemdik deńgeıdegi básekege qabiletti, bilikti maman bolyp qalyptasýlaryńyzǵa erekshe mán beredi. Memleket basshysy Qasym-Jomart Toqaev Tamyz keńesinde jańalyq pen progreske qushtar urpaqty tárbıeleýge ázir muǵalimderge suranys joǵary ekenin atap ótken edi. Osy rette Tuńǵysh Prezıdentimizdiń tapsyrmasymen «Pedagog mártebesi» týraly zań ázirlendi», dedi Premer-Mınıstr. Úkimet basshysynyń aıtýynsha, atalǵan zańda ustazdardyń jalaqysyn ósirýge, áleýmettik jaǵdaıyn jaqsartýǵa baǵyttalǵan naqty sharalar kózdeldi. Úkimet muǵalimderdiń ómir sapasyn arttyrýǵa, kúndelikti qyzmetin sapaly atqarýyna qajetti jumystar júrgizýde. «Qurmetti oqýshylar, mekteptiń ashylýyna oraı Qoǵamdyq mańyzdy bastamalardy damytý qory 3D modelderdi zertteýge arnalǵan vırtýaldy ǵylymı seksııasy bar «jasyl tehnologııalar» zerthanasyn tabys etti. Al «SaryarqaAvtoProm» iri otandyq zaýyty álemdik standarttarǵa saı jasalǵan avtobýsty syılap otyr», degen A.Mamın demeýshilerge alǵys aıtyp, oqýshylar men pedagogtarǵa sáttilik tiledi.
Saltanatty sharada Prezıdent Q.Toqaevqa Abaı óleńderin oqý estafetasyn joldaǵan Láılim Rysqalı arnaıy bas aqynnyń óleńin oqydy. Mánerinen ádep pen bilimge degen qushtarlyqtyń ıisi ańqıtyn oqýshy Láılim estafetany elordadaǵy №87 Abaı atyndaǵy jańa mektepten Almatydaǵy bas aqynnyń esimi berilgen bilim oshaǵyna joldady.
Merekelik jıynǵa oqýshylarmen birge ata-analar da kóptep kelgen. Kópshiliktiń atynan quttyqtaý sóz alǵan ana Aıgúl Aıymjanqyzy jańa mektep úshin rızashylyǵyn bildirdi. «Qurmetti oqýshylar, zamanaýı bilim alý jolyndaǵy qadamdaryńyzǵa sáttilik tileımiz. Al biz, ata-analar óz tarapymyzdan balalarymyzǵa tárbıe men bilim berýde ustazdar men mektebimizge qoldaý kórsetemiz», dedi ol.
Osydan soń alǵashqy qońyraý soǵylyp, Premer-Mınıstr jańa mektepti aralap kórdi. Qonaqtardy qarsy alǵan oqýshylar bilim oshaǵynan ashylǵan Abaı murajaıy, «Abaıtaný», «Jasyl tehnologııalar» jáne «Vırtýaldy ǵylymı zerthanalar» kabınetterin tanystyrdy. Murajaı uly aqynnyń týǵan jeri, ósken ortasynan tanymdyq aqparat beretin «Bala Abaı», óleńderine negizdelip salynǵan kartınalar, Qunanbaı zamanynan saqtalyp kele jatqan tas dıirmen sekildi jádigerleri bar «Aqyn Abaı» jáne eńbekterin nasıhattaýmen, ónerin jalǵastyrýmen aınalysqandarǵa arnalǵan «Abaıdyń aqyn shákirtteri» atty úsh bólimnen turady. Budan bólek, qonaqtar qor jabdyqtaǵan vırtýaldy ǵylymı zerthanada bolyp, zamanaýı tehnologııalarmen jumys istep kórdi. Sonymen qatar Úkimet múshelerine mekteptiń keń ashanasy tanystyryldy.
900 orynǵa laıyqtalǵan mektep gýmanıtarlyq baǵytta jumys isteıdi, sondaı-aq balalarǵa memlekettik tilde bilim beredi. Ondaǵy oqý kabınetteriniń sany – 36. Bilim oshaǵyna 1026 bala qabyldanǵan, onyń ishinde 153 oqýshy alǵash ret mektep partasyna otyrdy. Bilim jáne ǵylym mınıstri Ashat Aımaǵambetov jańa mekteptiń birneshe problemany sheship otyrǵanyn jetkizdi. «Osy mekteptiń balalary buǵan deıin úsh aýysymmen oqıtyn. Sondyqtan bul bilim oshaǵy bas qaladaǵy úsh aýysymmen jumys istegen eki mekteptiń máselesin sheship otyr. Ári qazaqtyń uly tulǵasy Abaı esiminiń berilýi ustazdar men oqýshylarǵa jaýapkershilik júkteıdi. Elimizdegi árbir oblys ortalyǵynda bas aqyn atyndaǵy mekteptiń bolýyn qolǵa alyp otyrmyz», dedi mınıstr.