Aımaq basshysy Qumar Aqsaqalov óńirge jumys saparmen kelgen Eýropadaǵy Qaýipsizdik jáne Yntymaqtastyq Uıymynyń Az ulttar isteri jónindegi joǵarǵy komıssary Lamberto Zanerdi qabyldady.
Kezdesý barysynda qoǵamdyq-saıası ahýal, etnosaralyq qatynastar salasyndaǵy memlekettik saıasatty qalyptastyrý men júzege asyrý máseleleri talqylandy.
«Elishilik tatýlyq, kelisim, birlik, toleranttyq táýelsiz Qazaqstannyń basty ustanymy bolyp tabylady. Memleket basshysy Qasym-Jomart Toqaev jýyrda jarııalaǵan “Syndarly qoǵamdyq dıalog – Qazaqstannyń turaqtylyǵy men órkendeýiniń negizi” Joldaýynda bul máselelerge aıryqsha nazar aýdardy. Ulttyq tutastyq qashanda halyqtar arasyndaǵy ózara túsinistik pen senimge negizdeledi», dedi Qumar Irgebaıuly.
Ultaralyq kelisimniń biregeı qazaqstandyq úlgisi óńirde de óz jalǵasyn taýyp keledi. Qazaqstan halqy Assambleıasysekildi biregeı qurylymnyń belsendi is-qımyly arqasynda túrli etnos ókilderi bir shańyraqtyń astynda ózara jarasym taýyp otyr.
Lamberto Zaner memlekettiń ult birligin nyǵaıtý, ártúrli etnostyq toptardyń tilderin, mádenıetin damytý baǵytynda atqarylyp jatqan etnosaralyq jáne dinaralyq kelisimniń qazaqstandyq modelin joǵary baǵalady.
Soltústik Qazaqstan oblysy