«Qalalyq týrızm basqarmasynyń uıymdastyrýymen ótken zergerler konkýrsynda «Alma-syrnaı» úzdik dep tanyldy. «Almaty Art center» ortalyǵynda bolǵan baıqaýǵa elimizdiń túkpir-túkpirinen qolónershiler kelgen» dep habarlaıdy Almaty qalasy ákimdiginiń baspasóz qyzmeti.
Bul jolǵy baıqaýǵa 50 úmitkerdiń ishinen iriktelgen 20-sy qatysty. Baıqaýdyń basty maqsaty Almatynyń brendin anyqtaý bolypty.
«Bul konkýrstyń maqsaty – Qazaqstandyq qolóner sheberleriniń myna sývenır, kádesyı jasaıtyn adamdardyń jumystaryn qoldaý. Mysaly, siz qaı memleketke barsańyz da shetelde ár túrli kádesyılar alyp kelesiz. Kem degende magnıt bolýy kerek. Sondyqtan Almatyda kádesyıjoq dep aıtýǵa bolmaıdy. Biraq olardyń sany ázir az» dedi «Qazaq-Oner» qolóner ortalyǵynyń basshysy Aıgúl Janserikova.
Kórmege qoıylǵan sývenırler kelgen kórermenderdiń kóńilinen shyqty. Is-shara barysynda sheberlerdiń qolynan shyqqan qazaqy naqyshtaǵy týyndylar da satylymǵa tústi.
«Negizgi talap – kádesyılar buǵan deıin bolmaǵan bolýy kerek. О́zindik ereksheligi bolǵan. Sonymen qatar biz ony óndiriske shyǵarmaq oıdamyz. Iаǵnı ol - kishkentaı, qarapaıym, biraq qazaqtyń qolónerin kórsetetin, qazaqtyń tarıhyn kórsetetin, Almatynyń óziniń ereksheligin kórsetetin sondaı buıym bolýy kerek boldy», – deıdi Almaty qalasy Týrızm basqarmasy basshysynyń orynbasary Baýyrjan Birbaev.
Sonymen, 20 zerger usynǵan 20 jumystyń ishinen «Alma-syrnaı» úzdik dep tanyldy. Kádesyıdyń avtory Azamat Baqı jýrnalıstermen kezdesken kezde Almatyny «alma» beınesinde elestetip, sımvoly retinde sazdy alma-aspabyn jasaǵanyn aıtty.
Bas júldege 1 mln teńge berildi. Ekinshi orynǵa 700 myń, al úshinshi oryn alǵan zerger 500 myń teńgege ıe boldy.
«Ol jerde tapsyrǵan jumysym - keramıkadan jasalǵan alma. Ol aspapqa «alma-syrnaı» degen at berdik. Baıqaý barysynda ony basqa aspaptarmen súıemeldep oınap, birinshi orynǵa ıe boldyq», – deıdi qolóner baıqaýynynyń jeńimpazy Azamat Baqı.
ALMATY