Elbasy kitaphanasynda qazaqtyń uly aqyny, dana oıshyly, sazger, aǵartýshy, qoǵam qaıratkeri, qazaq jazba ádebıetiniń negizin qalaýshy jáne tuńǵysh klassıgi Abaı Qunanbaıulynyń shyǵarmashylyǵyna arnalǵan áleýmettik jelilerde jarııalanǵan «III Abaı oqýlary» jyl saıynǵy ádebıet saıysynyń jeńimpazdaryn marapattaý rásimi ótti.
Kitaphanada 2017 jyldan bastaý alǵan ádebı saıystyń maqsaty – Elbasynyń jahandyq bastamalarynyń biri «Rýhanı jańǵyrý» baǵdarlamasyna aqparattyq-ımıdjdik qoldaý kórsetý jáne Abaı Qunanbaıulynyń ádebı murasyn jastar arasynda nasıhattaý, qazaqstandyq jastardyń oqý mádenıetin, ádebı talǵamyn qalyptastyrý.
Sharanyń shymyldyǵyn Elbasy kitaphanasynyń dırektory, professor Ámirhan Rahymjanov ashty.
- «Elbasy kitaphanasynyń «Abaı oqýlary» ádebıet saıysynyń bastamashasy bolýy kezdeısoqtyq emes. Olaı deıtinim, «Abaı – qazaq halqynyń rýhanı kósemi» degen Qazaqstan Respýblıkasynyń Tuńǵysh Prezıdenti – Elbasymyz Nursultan Ábishuly Nazarbaev ómirbaıandyq týyndylarynda bala kezinen ultymyzdyń rýhanı maqtanyshy dana Abaıdyń shyǵarmalarymen ósip, tárbıe alǵanyn árqashan da maqtan tutatynyn aıtady. Bıyl úshinshi ret ótkizilip kele jatqan «Abaı oqýlary» ádebıet saıysy arqyly, birinshiden, «О́ldi deýge syıa ma oılańdarshy, ólmeıtuǵyn artyna sóz qaldyrǵan», - degen kemeńger Abaıdyń ózi ólgenmen onyń sózi máńgi ekenin pash etý bolsa, ekinshiden, Abaıdyń aıtyp, Alladan tilegen halyqtyń myzǵymas birligi men jarasqan yntymaǵyna úles qosý. Elbasymyzdyń osydan eki jyl buryn jarııalaǵan «Rýhanı jańǵyrý: bolashaqqa bastar jol» maqalasy Abaıdyń uly jolyn jalǵastyrǵan eldiń rýhyn kótergen mańyzdy tarıhı oqıǵa boldy. Baǵdarlamalyq maqalasynda Elbasymyz «Álemdegi eń damyǵan 30 eldiń qataryna qosylý úshin bizdiń sanamyz isimizden ozyp júrýi, ıaǵnı odan buryn jańǵyryp otyrýy tıis» - dedi. Elbasymyz aıtqandaı, Abaı rasynda halqymyzdyń rýhanı kósemi. Abaı qashanda qazaq halqynyń rýhanı uly kóshiniń basynda. Abaı sózi, Abaı ánderi máńgi jańǵyra, jańara bermek, - dedi Ámirhan Muratbekuly.
Kelesi sóz kezegin alǵan Qazaqstan Respýblıkasy Parlamenti Senatynyń depýtaty Nurtóre Júsip barlyq baıqaý qatysýshylaryn quttyqtap, Abaı áleminiń san qyrlyǵyna toqtaldy.
- Uly Abaı aqyn ǵana emes. Ol – fılosof, ol – aýdarmashy, ol – kompozıtor. Qudaıdyń Abaıdyń boıyna bergen qasıetin sanap taýysa almaısyń. Men bir ǵana keremetine toqtalaıyn, orystyń aqyny Mıhaıl Lermontov nemistiń aqyny Iogann Geteniń óleńin aýdardy. Abaı M.Lermontovtyń aýdarǵan óleńin «Qarańǵy túnde taý qalǵyp, Uıqyǵa keter balbyrap» dep qazaqsha sýrettep sóıletip qana qoımaı, soǵan án shyǵardy. Oǵan qosa, Abaı qazaq halqyn Aleksandr Pýshkınniń shyǵarmashylyǵymen tanystyrýdy aqynnyń «Evgenıı Onegın» poemasyn aýdarýdan bastap, «Tatıananyń hatyna» án jazdy. Qazirgi bilikti kompozıtorlardyń ózderi dál osy Abaıdyń ánderindeı áýezdi, qudiretti, sezimtal dúnıeniń sol zamanda bolmaǵanyn moıyndaıdy, - dep atap ótti Nurtóre Baıtilesuly.
Áleýmettik jeliler mol tájirıbesi bar qalyń oqyrman qaýymnyń jáne Abaı týyndylarymen jańadan tanysqan jas oqyrmandardyń keńinen qoldanatyn belsendi «kezdesý ornyna» aınalǵan. Joba, eń aldymen, jastarǵa baǵyttalsa da elimizdiń barlyq óńirlerin qamtıtyn túrli jastaǵy turǵyndar men ár salada eńbek etetin mamandardyń basyn qosty. Bıyl úshinshi ret uıymdastyrylyp jatqan baıqaý qatysýshylarynyń sany byltyrǵymen salystyrǵanda kóbeıgen. Dástúrli saıysqa elimizdiń túkpir-túkpirinen jáne alys-jaqyn shetelderden eki júzdiń ústinde ótinim kelip túsken. Onyń ishine Eýropa men Azııa elderin jáne TMD elderinen kelip túsken jumystar da bar. Al, 20 myńnan astam paıdalanýshylar Feısbýk, Instagram jáne basqa da áleýmettik jeliler arqyly ádebı saıysty túsiniktemeler, lúpildemeler qoıýmen qoldady.
Shara barysynda «Abaı murasyn álemdik deńgeıde nasıhattaýshy» nomınasııasynyń ıegeri Bekzat Smaǵulov Abaıdyń «Segiz aıaq» ánin naqyshyna keltirip shyrqady.
Sondaı-aq qatysýshylar men qonaqtar Elbasy kitaphanasy uıymdastyrǵan uly Abaı shyǵarmashylyǵyna arnalǵan kitap kórmesin de tamashalady.
Baıqaý qorytyndysy boıynsha tómendegi qatysýshylar jeńimpaz atandy:
Bas júlde – Gúlbıbi Seıdalıeva (Sársen Amanjolov atyndaǵy Shyǵys Qazaqstan memlekettik ýnıversıtetiniń 4-kýrs stýdenti, О́skemen qalasy);
I oryn – Araı Jylqybaeva (QR Prezıdenti Is Basqarmasy Medısınalyq ortalyǵy aýrýhanasynyń dáriger-menedjeri, Nur-Sultan qalasy);
II oryn – Medına Jylqybaeva (Aqmola oblysy Qosshy aýylyndaǵy №2 mekteptiń 10-synyp oqýshysy);
III oryn – Ersultan Núsipjanov (Taraz memlekettik pedagogıkalyq ýnıversıtetiniń 3-kýrs stýdenti, Taraz qalasy);
«Abaı murasyn álemdik deńgeıde nasıhattaýshy» nomınasııasy – Bekzat Smaǵulov (QR Mádenıet ján sport mınıstrligi О́ner departamentiniń sarapshysy);
«Eń kishkentaı úmitker» nomınasııasy – Hasen Jiger men Anel Mýhamajıtova (Pavlodar oblysy Ekibastuz qalasyndaǵy №24 «Aınalaıyn» balabaqshasynyń tárbıelenýshileri);
«Kórermen kózaıymy» nomınasııasy – Qyrmyzy Aryn (Nur-Sultan qalasyndaǵy Nazarbaev zııatkerlik mektebiniń 8- synyp oqýshysy);
«Eń belsendi qatysýshy» nomınasııasy – Muhamedjan Ábdıev (Taraz qalasyndaǵy B.Momyshuly atyndaǵy № 45 mektep-gımnazııanyń 7-synyp oqýshysy, Taraz qalasy).
Shara sońynda «Abaı oqýlary» ádebı saıysynyń jeńimpazdary men júldegerleri Elbasy kitaphanasynyń basshylyǵy men qyzmetkerlerine jobany uıymdastyrǵandary úshin rızashylyqtaryn bildirdi.