Elimizde bazarlardaǵy baǵanyń negizsiz ósýine jol bermeý jáne taýar ótkizý tizbekterin ashyq qalyptastyrý baǵytyndaǵy jumys kúsheıtildi. Bul rette ónimsiz deldaldardy qysqartý, kóleńkeli aınalymdy azaıtý jáne ádil básekelestikti ornyqtyrý negizgi basymdyqqa aınalyp otyr, dep habarlaıdy Egemen.kz.
16 sáýir kúni Saýda komıtetiniń tóraǵasy Ernur Jáýtikbaev Túrkistan qalasynda Túrkistan, Qyzylorda, Jambyl oblystary men Shymkent qalasynyń bazar ıeleri jáne saýda nysandary ákimshilikteriniń qatysýymen keńes ótkizdi.
Ishki saýda qaǵıdalaryn jetildirý aıasynda zańnamalyq deńgeıde bólshek saýda júzege asyrýshylar men kóterme jetkizýshilerdiń arajigi ajyratyldy. Osylaısha satyp alý-satý úderisine qatysýshylar júıelenip, qosylǵan qun qalyptastyrmaıtyn, biraq sońǵy baǵaǵa áser etetin ónimsiz deldaldardyń qatysýy shekteldi.
Komıtet tóraǵasy bazar ıeleriniń zań talaptaryn qatań saqtaý qajettigin atap ótti. Negizgi talaptardyń biri – aqparattyq júıelerdi mindetti túrde qoldaný. Bul júıelerde satýshylarmen jasalǵan barlyq sharttar, jaldaý tólemderi men saýda talaptary tolyq tirkelýi tıis. Ashyq sıfrlyq eseptiń bolmaýy naqty aınalymnyń burmalanýyna, beıresmı esep aıyrysýlarǵa jáne ónimsiz deldaldardyń paıda bolýyna jol ashady. Osyǵan baılanysty baqylaý sharalary eń aldymen aqparattyq júıelerdi qoldanbaıtyn sýbektilerge baǵyttalyp otyr.
Avıaotyn naryǵynda deldaldar azaıdy
Ernur Jáýtikbaevtyń aıtýynsha, elimiz boıynsha bazarlar qyzmetine, ásirese kóterme saýda segmentinde keshendi jumys bastaldy. Bul jumysqa Memlekettik kirister organdary, ishki ister organdary, antımonopolııalyq organ jáne jergilikti atqarýshy organdar tartylǵan. Úılestirý Saýda mınıstrligi tarapynan júzege asyrylyp jatyr.
Sonymen qatar salyqtyq ákimshilendirý quraldary kúsheıtildi. Onyń ishinde saýda qyzmetine hronometraj júrgizý tetigi engizilip, naqty aınalym men deklarasııalanǵan kórsetkishterdi salystyrý arqyly kóleńkeli aınalym belgilerin anyqtaýǵa múmkindik berilip otyr.
Baqylaý is-sharalarynyń qorytyndysy boıynsha aýmaqtyq saýda jáne tutynýshylardyń quqyqtaryn qorǵaý departamentteri zań buzýshylyqtardy joıý týraly uıǵarym shyǵarady. Aqparattyq júıelerdi mindetti túrde qoldaný talaptary oryndalmaǵan jaǵdaıda ákimshilik aıyppul salynady, al qajet bolǵan jaǵdaıda zańnamaǵa sáıkes neǵurlym qatań sharalar qoldanylyp, is sot tártibimen qaralady.
«Bazar – bul jasyryn shemalar orny emes. Árbir qatysýshy zań aıasynda jumys isteýi tıis. Kez kelgen saýda qyzmeti ashyq ári sıfrlyq formatta júrgizilýi qajet. Aqparattyq júıelerden tys jumys isteý – jasyryn ekonomıka men baǵa burmalaýshylyqtarynyń tikeleı táýekeli. Eger naryq qatysýshylary belgilengen talaptarǵa saı jumys isteýge daıyn bolmasa, memleket barlyq zańdy tetikterdi dáıekti túrde qoldanady», dedi Saýda komıtetiniń tóraǵasy.
Ár óńirde oblys ákimderiniń orynbasarlary tóraǵalyq etetin óńirlik komıssııalar jumys isteıdi. Olar taýar ótkizý tizbekterin taldap, ónimsiz deldaldardy anyqtap, olardy tizbekten shyǵarý boıynsha sheshim qabyldaıdy. Sonymen qatar keıbir óńirlerde bul jumystyń formaldy sıpatta júrgizilip otyrǵany da aıtyldy.
Jyl basynan beri elimizde 316 óńirlik komıssııa otyrysy ótip, nátıjesinde saýda tizbekterinen 76 deldaldyq býyn shyǵarylǵan. Saýda komıteti ákimdikterge bul jumystyń naqty nátıjeliligin qamtamasyz etip, ashyq ári tıimdi jetkizý tizbekterin qalyptastyrýdy kúsheıtýdi tapsyrdy.
Jalpy, qabyldanyp jatqan sharalar jasyryn ekonomıkanyń úlesin azaıtýǵa, adal básekelestikti damytýǵa jáne halyq úshin ádil baǵa qalyptastyrýǵa baǵyttalǵan.
Jumys sapary barysynda Ernur Jáýtikbaev Túrkistan oblysyndaǵy turaqtandyrý qoryn, áleýmettik dúkenderdi jáne birqatar bazardy aralady. Mundaı keńester aldaǵy ýaqytta ózge óńirlerde de jalǵasyp, ár aımaqtaǵy jaǵdaı jeke qaralady.
15%-dyq mejeden asqan: Azyq-túlik baǵasyn negizsiz kótergen kásipkerge aıyppul salyndy