Reseıdiń Sochı qalasynda dástúrli túrde uıymdastyrylatyn «Valdaı» halyqaralyq pikirtalas klýbynyń HVI plenarlyq sessııasy álemdik BAQ nazarynan tys qalǵan joq. Álemdik saıası qurylymdaǵy Shyǵystyń rólin talqylaýǵa arnalǵan tórt kúndik shara kóptegen halyqaralyq sarapshylar men BAQ ókilderiniń jiti baqylaýynda boldy.
Reseıdiń «Argýmenty ı fakty» gazeti aýqymdy pikirtalasqa 37 elden 143 sarapshy qatysatynyn habarlaǵan. Bıylǵy otyrys sheteldik qonaqtardyń da paneldik otyrystarǵa qatysýymen erekshelenetinin málimdegen. «Otyrystyń alǵashqy kúni qyzý talqylaýlarmen bastaldy. Qatysýshylar álem arenasynda bolyp jatqan ózgerister, ondaǵy negizgi oıynshylar týraly oılarymen bólisti. Úlken derjavalardyń birin-biri moıyndamaýy da úlken problemaǵa aınalǵanyn sóz etti. Osy oraıda qytaılyq sarapshylar aldaǵy kezde úlken ekonomıkalyq ózgerister bolatynyn, ol ózgeristerge Qytaı kompanııalary áser etetinin aıtyp ótti», delingen gazet habarlamasynda.
Ázerbaıjannyń Online News Agency agenttigi halyqaralyq jıynda Ázerbaıjannyń kóp jyldan beri sheshimi tabylmaı kelgen máselesi Taýly Qarabah ta nazarǵa alynǵany týraly jazady. Ázerbaıjan prezıdenti Ilham Álıevtiń Armenııa premer-mınıstri Nıkol Pashınıanniń «Qarabah – Armenııanyń jeri» degen málimdemesine jaýabyn da keltirgen.
«Vestnık Kavkaza» gazeti bıylǵy otyrysqa sheteldik sarapshylardyń kóptep kelgenin, ár sarapshynyń óz oıy, pikiri men alypqosary baryn baıandaǵan. Sonymen qatar saıasatkerlermen birge ǵalymdar, ýnıversıtet rektorlary da, atap aıtsaq, MGIMO rektory Anatolıı Torkýnov ta boı kórsetkenin jazady.
RT halyqaralyq televızııa jelisi bıylǵy pikirtalastyń Batystyń álem saıasatyndaǵy qarqyny men ústemdigi báseńdegenin, árbir delegat óz elinde túıinin tappaǵan máselelerdi atap ótýge tyrysqanyn habarlaıdy. «Fılıppın prezıdenti Rodrıgo Dýterte memleketindegi esirtki problemasy týraly baıandap, sarapshylar pikirin estýge múmkindik aldy» delingen arna habarlamasynda.
«Izvestııa» gazeti bıylǵy taqyryptyń Shyǵysqa qatysty bolýy tegin emes ekenin jazady. Oǵan dálel retinde «Valdaı» klýbynyń qor keńesiniń tóraǵasy Andreı Bystrıskııdiń «Kezinde «úlken jetilik» ishki jalpy ónimniń 70 paıyzyna áser etse, qazir tek 40 paıyzyna ǵana úlesker» degen pikirin keltiredi. Sonymen birge bıylǵy pikirtalas taqyryptarynyń qataryna Afrıka máselesi, álemdik energetıka naryǵy, ıslam álemi syndy tyń taqyryptar engenin málimdeıdi.
«Anadolu ajansı» agenttigi Qazaqstan Prezıdenti Qasym-Jomart Toqaev pen Reseı Federasııasy Prezıdenti Vladımır Pýtınniń kezdeskenin, bul Q.Toqaevtyń alǵashqy qatysýy ekenin atap ótken. Sonymen qatar agenttik «О́z kezeginde Reseı Prezıdenti Qasym-Jomart Toqaevqa shaqyrtýdy qabyl alǵany úshin alǵys bildirdi. «Bul taqyryptarda tájirıbeńiz mol, ózińizdiń pikirińizdi bilý biz úshin qyzyq ári paıdaly bolmaq» degen V.Pýtınniń sózin jarııalady.
CNBC arnasy memleketterdiń qorǵanysy, ásirese Qytaıdyń áreketteri týraly áńgime órbigenin, Túrkııanyń NATO-ǵa qosylý múmkindigi týraly sóz qozǵalǵanyn jazady.
Reuters halyqaralyq agenttigi «Shtaınmaıer formýlasynyń» qyzý talqyǵa túskenin, Palestına men Izraıl arasyndaǵy shıelenisti sheshý, Sırııadaǵy soǵys máseleleri talqylanyp, birneshe usynys bolǵanyn habarlaıdy. Osy rette agenttik habarlamasynda «Reseı Prezıdenti V.Pýtın Azııa álemdik mejeden asyp, ómir súrý deńgeıi joǵary bolǵandyǵymen erekshelenetinin eskergenin, eń ozyq tehnologııalar belsendi engizilip jatqanyn aıtty» delingen.
The Jordan Times gazeti Iordanııa Koroli Abdalla II-niń qatysqanyn, alqaly jıynda álemdi alańdatqan máselelerdiń sóz bolǵanyn, Qazaqstan Prezıdenti Qasym-Jomart Toqaevtyń Astana prosesi aıasynda Eýropadaǵy kelissózderdiń 13-raýndy ótkenin, Qazaqstannyń Aýǵanstanǵa erekshe kóńil bóletinin jáne qajetti kómek kórsetetinin atap ótken. Oǵan qosa Qazaqstan árdaıym dıplomatııanyń jáne qarýsyzdanýdyń dáıekti jaqtaýshysy bolatynyn da málimdegen.