О́mir kúnde toı emes. О́mir bolǵan soń onyń qıyn-qystaý, qysyl-taıań, synı sátteri qatar kelip jatady. Bul rette adam ómirine qaýip tóndiretin kezder de kezdesedi. Osyndaı almaǵaıyp shaqta ózderine tóngen qaýip-qaterge qaramastan eń alǵashqy kómekke keletinder qutqarýshylar ekeni belgili. Olardy tótenshe jaǵdaılarǵa qarsy batyl is-qımyl jasaı alatyn búgingi kúnniń qaharmandary dese de azdyq emes.
Egemen elimizde qutqarýshylarǵa qurmet kórsetip, ózderine júktelgen mindetti oryndaý kezinde qaza tapqan mamandyq ıeliriniń rýhyna taǵzym etý úshin Aqtóbe qalasynda qoladan eskertkish qoıyldy.
Qutqarýshylar saıabaǵynda ornatylǵan eskertkish-monýmenttiń jalpy bıiktigi 4,7 metr. Onyń tuǵyryna «Táýelsiz qazaq eliniń qutqarýshylaryna taǵzym» degen qasterli sózder latyn tilinde jazylǵan. Qaýip-qateri men jaýapkershiligi mol mamandyq ıelerine qoıylǵan eskertkish Aqtóbe oblysynyń azamattyq qorǵanys uıymdary men ardagerler keńesiniń bastamasy boıynsha boı kótergen. Onyń qarjylyq shyǵynyń qutqarýshylardyń jankeshti eńbekterine árkez qurmetpen qaraıtyn mesenant-kásipkerler tólegen.
Eskertkishtiń ashylý rásimine qatysýshylar kásibı mindetteri men paryzdaryn oryndaý kezinde qutqarýshylardyń rýhyna bas ıip, bir mınýt únsiz turdy. Sodan soń Aqtóbe qalasynda №6555 áskerı bólimniń jaýyngerleri birneshe dúrkin aspanǵa oq jaýdyryp, qurmet pen taǵzym belgisin kórsetti.