Almaty oblysynyń ońtústik-shyǵysynda ornalasqan qara dala aımaǵy álimsaqtan óziniń tarıhı erekshelikterimen kóz tartyp keledi. Sharyn shatqaly ekologııalyq, ǵylymı mańyzdylyǵymen aıshyqtalsa, jer asty ystyq sý kózderine sheteldik týrıster jıi qyzyǵýshylyq bildirýde.
Al aýdandaǵy sırek kezdesetin ósimdikter men janýarlar dúnıesi qorǵaýǵa alynǵan, qoınaýy qazynaǵa toly kıeli ólkege jyldyń tórt mezgilinde de tańdanyspen qaraıtynymyz anyq. Osynaý erekshelikterimen aıshyqtalǵan Uıǵyr aýdanynyń Aqtam aýylynda jaqynda Qazanǵap Mahanbekuly atyndaǵy jańa meshittiń ashylý rásimi ótti.
Ketpen jotasynyń eteginde ornalasqan aıadaı ǵana aýylda ósip óngen Nurlan Qazanǵapuly árdaıym ıgi bastamalardy qoldap, aýylǵa qoldaý kórsetýden esh aıanbaǵan. Osy joly da meshittiń ashylýyna muryndyq boldy. «Irgeli isterin eliniń ıgiligine jumsap júrgen Nurlan Qazanǵapuly 2007 jyly Eńbekshi qazaq aýdany, Báıterek aýylynda meshit salyp, 2019 jylda sol meshitti qaıta jóndeý jumystaryn júrgizip Qosqulaq bıdiń atymen ashylý rásimin ótkizdi. bolatyn. Mine, sol ıgi bastama jalǵasyn taýyp týǵan aýlynda jańa meshittiń boı kóterýine sebepker boldy», deıdi Tańjaryq Nurmuhanuly. Osyndaı abzal azamat aýyl halqynyń dinge bet buryp, ıman júzdi jastar qatarynyń artýyna súbeli úles qosa otyryp, aýyldyń ortasynan jarqyratyp meshit salyp berdi.
Jańa meshittiń ashylý saltanatyna alys-jaqynnan arnaıy qonaqtar kelip, quttyqtaý lebizderin arnady. Aqtam aýylynyń turǵyndary jomarttyq tanytyp, eline eleýli eńbek etip jatqan Nurlan aǵamyzdyń ıyǵyna shapan jaýyp, astyna at mingizse, Báıterek aýylyndaǵy Qosqulaq ata atyndaǵy meshittiń bas ımamy Ábdiǵanı aqsaqal «Beıbitshilik álemi» shyǵarmashylyq birlestigi atynan «El ardaqtysy» tósbelgisin Nurlan Qazanǵapulyna tabys etti.
Meshitte as berilip, quran oqyldy. Aqtam aýyly turǵyndary tús aýa Alaman báıgeni tamashalap, atqa miner azamattary kókpar tartty.