Býdapeshtte (Majarstan) kúres túrlerinen 23 jasqa deıingi jastar arasyndaǵy álem chempıonaty jalǵasýda. Kezekti jarys kúninde qazaqstandyq balýan Iýsýp Batyrmyrzaev álem birinshiliginde qola medal jeńip aldy.
Dúnıejúzilik birinshilikte 125 kılo salmaqta synǵa túsken otandasymyz bastapqy básekede japonııalyq Taıkı Iаmomotodan (8:2) basym túskenimen, kelesi kezdesýinde ırandyq Abbas Zareden (7:17) utyldy. Parsy balýany fınalǵa shyqqannan keıin jerlesimiz jubanysh básekesine qatysýǵa múmkindik aldy. Jubanysh beldesýinde Iýsýp Moldova sportshysy Samhan Djabraılovty (14:4) jeńip, qola júlde úshin ótken básekede grýzııalyq balýan Zýrıko Ýrtashvılıdi 13:2 esebimen aılasyn asyryp, jarystyń qola júldesine ıe boldy.
Aıta keteıik, buǵan deıin álem chempıonatynda taǵy bir qazaqstandyq balýan Adlan Asqarov el qorjynyna kúmis júldeni salǵan bolatyn.