Beıjińde Qazaqstan Respýblıkasy Premer-Mınıstriniń birinshi orynbasary – Qazaqstan Respýblıkasynyń Qarjy mınıstri Á.Smaıylov pen Qytaı Halyq Respýblıkasy Memlekettik Keńesi Tóraǵasynyń orynbasary Han Chjenniń tóraǵalyǵymen Qazaqstan-Qytaı Yntymaqtastyq komıtetiniń 9-otyrysy ótti.
Qazaqstan Respýblıkasy – Qytaı Halyq Respýblıkasy Yntymaqtastyq komıtetiniń 9-otyrysynda saýda-ekonomıkalyq, energetıkalyq, ǵylymı-tehnıkalyq, qarjylyq, kólik, mádenı-gýmanıtarlyq, sý jáne ekologııalyq, geologııalyq jáne kedendik yntymaqtastyq pen qaýipsizdik salasyndaǵy 10 mamandandyrylǵan kishi komıtettiń jáne eki birlesken komıssııanyń jumys nátıjeleri qaraldy.
Taraptardyń damý maqsattary men tujyrymdamalary uqsas, tyǵyz baılanys pen úılestirý bar, sondaı-aq túrli salalardaǵy yntymaqtastyqtyń sapasy men deńgeıi kún sanap jaqsaryp kele jatqany aıtyldy.
Qazaqstan Respýblıkasy men Qytaı Halyq Respýblıkasy arasyndaǵy saýda-ekonomıkalyq yntymaqtastyqtyń ortamerzimdi jáne uzaqmerzimdi perspektıvalarǵa baǵyttalǵan (2020-2025 jj.) Birlesken damý josparyn júzege asyrý týraly kelisimge qol jetkizildi.
Qazaqstan Respýblıkasy men QHR arasyndaǵy ózara saýda-sattyq aıasyn keńeıtý maqsatynda Qytaıǵa qazaqstandyq eksporttyq ónimderdi, sonyń ishinde energetıka men aýylsharýashylyq ónimderin jetkizý kólemin arttyrý týraly kelisim jasaldy.
Otyrys qorytyndysy boıynsha Komıtet tóraǵalary hattamaǵa qol qoıdy. Taraptar Komıtettiń 10-otyrysyn 2021 jyly Qazaqstanda ótkizýge kelisti.
Aıta ketý kerek, Qazaqstan-Qytaı Yntymaqtastyq komıteti 2004 jyly túrli saladaǵy ekijaqty qatynastardy júıeli jáne jan-jaqty damytý maqsatynda quryldy.