Qazaqstan Respýblıkasy Mádenıet jáne sport mınıstrliginiń Til saıasaty komıteti Qazaqstan Respýblıkasynda tilderdi damytý men qoldanýdyń 2011 - 2020 jyldarǵa arnalǵan memlekettik baǵdarlamasy aıasynda «Tekti sózdiń tóresi – terme» respýblıkalyq jyrshy-termeshiler baıqaýyn ótkizedi.
Baıqaýda Qazaqstan Respýblıkasynyń Tuńǵysh Prezıdenti – Elbasy N.Á. Nazarbaevtyń 2019 jyl Jastar jyly dep jarııalanýyna jáne Súgir jyraý Begendikulynyń 125 jyldyq mereıtoıyna oraı taqyryptyq baǵyttardaǵy shyǵarmalardy elimizdiń 14 oblysynan jáne Nur-Sultan, Almaty, Shymkent qalalarynan bir-bir úmitkerler oryndap, óz baqtaryn synaıdy.
Uıymdastyrýshylardyń aıtýynsha, ulttyq tárbıe men halyqtyq ónerdi nasıhattaýǵa baǵyttalǵan bul baıqaýdyń basty maqsaty jańa jyr-termelerdi týdyrý arqyly jyrshylyq, termeshilik ónerge jańasha serpin berý jáne ádebı tildi damytýǵa, til mádenıetin jetildirýge úles qosý.
Is-sharaǵa ónertanýshylar, jyrshy-termeshiler, qoǵam qaıratkerleri, zııaly qaýym ókilderi qatysady.
Jyrshy-termeshilermen birge tanymal ánshiler óner kórsetetin baıqaý 9 qarasha kúni Qyzylorda qalasy A.Toqmaǵambetov atyndaǵy mádenıet úıinde ótedi.