Býharest qalasynda Qazaqstan Respýblıkasynyń Rýmynııadaǵy Elshisi Nurbah Rústemovtyń Rýmynııanyń Prezıdenti Klaýs Iohannıske senim gramotalaryn tapsyrý rásimi ótti. Bul týraly Syrtqy ister mınıstrliginiń baspasóz qyzmeti habarlady.
Atalǵan kezdesý barysynda Qazaqstannyń Elshisi Prezıdentti qaıta saılanýymen quttyqtap, uzaq merzimdi jáne ózara tıimdi yntymaqtastyqty nyǵaıtý men damytý jónindegi onyń qoldaýyna úmit bildirdi.
Sonymen qatar, qazaqstandyq dıplomat Qazaqstan Respýblıkasy Prezıdentiniń atynan Rýmynııanyń Memleket basshysyna shynaıy tilekterin jetkizdi.
Bul rette, Rýmynııanyń Prezıdenti qazaqstan-rýmyndyq qatynastaryn sapaly jańa deńgeıge shyǵarý úshin áleýet bar ekenin atap ótti. Osyǵan baılanysty, kóptegen salalarda ekijaqty baılanystardy tereńdetý jóninde senimdi qadamdar jasaýǵa shaqyrdy.
Kezdesý sońynda K. Iohannıs, QR Elshisin qyzmetke kirisýimen quttyqtap, aldaǵy ýaqytta da tabys tiledi.