Tarıhy tereń Áýlıeata óńirin týrıstik aımaqqa aınaldyrý búginde óńir úshin kún tártibindegi máseleniń biri. Sonymen qatar tabıǵat tamashalaryn da tıimdi paıdalaný aımaq týrızmin damytýǵa jol ashpaq. Bul rette tosyn tabıǵatymen erekshelenetin Jýaly aýdanynda «Qaraalma» taý shańǵy bazasyn ashý qolǵa alynǵan bolatyn.
Búginde atalǵan taý shańǵy bazasynyń qurylys jumystarynyń 85 paıyzy aıaqtalǵan. Sonymen qatar munda qonaqúı kottedjderi men týrısterge qyzmet kórsetetin servıstik keshenniń qurylysy salynýda. Sondaı-aq jeti shaqyrymdyq jol salynyp, ınfraqurylym tartý jumystary da óz deńgeıinde júrgizilýde. Oǵan qajetti qural-jabdyqtardyń deni jetkizilgen. Qurylys basynda 100-den astam jumysshy mundaǵy qystyń qataldyǵyna qaramastan, kún-tún demeı bilek sybana eńbek etýde.
Aıta ketý kerek, mundaǵy demalys kesheninde qonaqtar jyldyń tórt mezgilinde de demalýǵa múmkindik alady. Kelýshilerdi jaz mezgilderinde saýmalmen, qymyzben emdeıtin, atpen serýen quratyn oryndar ashylady dep kútilýde. Jalpy, nysan memlekettik-jekemenshik áriptestik negizinde salynýda. Jobanyń jalpy quny 4 mıllıard teńge. Týrıstik nysan Halyqaralyq «Batys Eýropa-Batys Qytaı» kúrejolynyń boıynan 7 shaqyrym qashyqtyqta, Alataýdyń baýraıynda teńiz deńgeıinen 1600 metr bıiktikte ornalasqan. Sonymen qatar Alataýdyń ushar basynan keshenge deıin 2 500 metr syrǵanaý jolaǵy túsken. Sol sııaqty 2050 jáne 350 metrlik aspaly joldardyń qurylystary da júzege asyrylýda. Aspaly jol qurylysyna qajetti qondyrǵylar munda Avstrııa elinen jetkizilgen.
Sonymen Jýaly aýdanyndaǵy «Qaraalma» taý shańǵy bazasy aldaǵy jeltoqsan aıynda paıdalanýǵa beriledi. Jambyl oblysynyń ákimi Asqar Myrzahmetov aýdanǵa arnaıy baryp, jaýaptylarǵa mundaǵy barlyq jumystardy sapaly atqarýdy, 350 metrlik aspaly joldyń montajdaý, ornatý sharalaryn aǵymdaǵy jyly 16 jeltoqsanǵa deıin aıaqtaýdy tapsyrdy. Al, uzyndyǵy 2 myń metrden asatyn aspaly joldyń qurylysyn bir-eki aıda tolyǵymen bitirý kerektigin de aıtty.