Basketboldan óńirdiń jas órenderi halyqaralyq, respýblıkalyq baıraqty básekelerde nátıjeli óner kórsetýde.
«Bilim-ınnovasııa» lıseıleri arasynda dástúrge aınalyp úlgergen respýblıkalyq jarysqa oblys ortalyǵyndaǵy atalmysh mazmunda bilim beretin mekemeniń «Kókshe BIL» komandasy qatysyp, jarys jeńimpazy atandy.
Komanda quramy joǵary synyp oqýshylarynan jasaqtalǵan. Osymen eki jyl qatarynan «Bilim-ınnovasııa» lıseıleri arasynda uıymdastyrylyp júrgen respýblıkalyq basketbol týrnırinen qarsylas shaq keltirmeı, bas júldeni jeńip keledi.
– Balalar qalaǵan ýaqytynda kelip sport zalda daıyndalady. Sabaqqa kedergi keltirmeıtindeı jaǵdaı jasap, qolymyzdan kelgenshe barlyq sporttyq jarystarǵa jiberip otyramyz, – deıdi oblystyq «Bilim-ınnovasııa» lıseı-ınternatynyń dırektory Ǵalymjan Esjanov.
Atyraý qalasynda ótken básekede 15 komanda baq synady. Tartysty ótken jarys barysynda kókshetaýlyq jas sportshylar óz boılaryndaǵy qaırat-jigerdi qapysyz kórsetip, naǵyz baptarynda ekendikterin utymdy oıyn órnekterimen dáleldegen.
– Bul meniń jetinshi synyptan beri daıyndaǵan balalarym. Jattyǵýlarymyz jemisin berip eki jyl qatarynan respýblıka chempıony atandyq. Balǵyndardy baptaý isimen birtalaı jyldardan beri aınalysyp kelemin. Bizdiń oqý ornymyz basketbolda ǵana emes basqa da sport túrlerinen respýblıkada úzdikter qatatynda, – deıdi bapker Erkebulan Qarasartov.
Búginde komanda chempıondyq ataqty saqtap qalý úshin endigi jyly О́skemen qalasynda ótetin jarysqa daıyndyqty bastap ketken. Sabaqtan qoldary qalt ete qalsa sport zalǵa jınalyp, sheberlikterin árkez shyńdap otyrady.
Aqmola oblysy