Almatydaǵy Balýan Sholaq atyndaǵy Mádenıet jáne sport saraıynda sporttyń jeti túri boıynsha Konfederasııa kýbogynyń jeńimpazdary anyqtaldy.
Júlde qory 165 mıllıon teńgeni quraǵan jarystyń boksshylar saıysynda Túrkistan oblysyna teń keler eshkim tabylmady. Quramynda Qaırat Erálıev, Sáken Bıbosynov, Bek Nurmaǵanbet, Bekdáýlet Ibragımov syndy sańlaqtary bar komanda jartylaı fınalda Qaraǵandynyń qyrandaryn utsa, aqtyq aıqasta elordalyq bylǵary qolǵap sheberlerinen basym tústi.
Erkin kúreste Nur-Sultannan kelgen jigitterdiń baǵy jansa, grek-rım kúresinde Shymkent qalasynyń ókilderi shashalaryna shań juqtyrmady. Olardyń ekeýi de sheshýshi tusta Almaty oblysy balýandarynan basym tústi.
Qazaq kúresinen ótken básekede Soltústik Qazaqstan oblysynyń saıypqyrandarynan jasaqtalǵan «Qyzyljar arlandary» klýby aldyna jan salmady.
Sonymen qatar, Almaty qalasynyń túlekteri eki birdeı sport túri boıynsha bas júldeni oljalady. Olar taekvondo men karate ótken jarysta top jardy. Al tatamıdegi tartysta Shyǵys Qazaqstan oblysynyń dzıýdoshylary daralandy.