Májiliste Prezıdent Jarlyǵymen memlekettik marapattardy tapsyrý rásimi ótti. Palata Tóraǵasy Nurlan Nyǵmatýlın Memleket basshysynyń atynan depýtattarǵa jáne apparat qyzmetkerlerine memlekettik nagradalardy tapsyrdy.
Táýelsizdik tabystaryna depýtattyq korpýstyń da qosqan úlesi zor. Memlekettik jáne qoǵamdyq qyzmeti úshin, elimizdiń áleýmettik-ekonomıkalyq jáne mádenı damýyna, halyqtar arasyndaǵy yntymaqtastyq pen dostyqty nyǵaıtýǵa qosqan eleýli úlesi úshin Májilis depýtattary Asqar Bazarbaev pen Gleb Shegelskıı «Parasat» ordenine, Májilis apparaty basshysynyń orynbasary Darhan Medeýbaı «Qurmet» ordenine ıe boldy. Al «Eren eńbegi úshin» memlekettik medali Májilis depýtattary Ivan Klımenkoǵa, Mansýrhan Mahambetovke, Taras Hıtýovqa, Petr Sharapaevqa tabys etildi. Qazaqstan Respýblıkasynyń Qurmet gramotasy apparat qyzmetkerleri Asqar Jaqypovqa, Marat Sadyqovqa jáne Aınash Táshimovaǵa berildi. Májilis Tóraǵasy sondaı-aq Májilis depýtattaryna TMD Parlamentaralyq Assambleıasynyń jáne EQYU Parlamenttik Assambleıasynyń nagradalaryn tabys etti, dep habarlady Parlament Májilisiniń baspasóz qyzmeti.