Almaty oblysynda ótken jyldyń esepti kezeńimen salystyrǵanda qurt aýrýyna shaldyqqandar sany azaıǵan. Bıylǵy 9 aıda týberkýlez dıagnozy qoıylǵan naýqas sany 8,7 prosentke tómendep, 665 derek tirkelgen. Byltyr naýqas adam sany – 721 bolǵan eken.
Jalpy, qurt aýrýynyń jańa paıda bolǵan oshaǵyn anyqtaý deregi Ile, Kerbulaq, Raıymbek aýdandary men Taldyqorǵan qalasy boıynsha 5 pen 12 adamǵa deıin tirkelse, Kóksý, Sarqan, Eskeldi, Talǵar aýdandarynda bir-bir naýqastan juqpaly aýrý tabylǵan.Al 100 myń adamǵa shaqqandaǵy naýqas adamdar úlesi Balqash, Raıymbek, Talǵar aýdandarynda basym eken jáne dertten kóz jumǵandar sanynan da osy óńirler kósh bastap tur.
Áleýmettik aýrý sanalatyn týberkýlezben kúresýdi dárigerlerdiń ıyǵyna júk qylyp artyp qoıýǵa bolmaıdy. Bul – memleket tarapynan sheshilgen másele. Onyń ishinde aýrýdy emdep, saýyqtyrýdan bólek, áleýmettik qoldaý arqyly ońaltý sharalary bar. Iаǵnı, qurt aýrýymen aýyrǵan adamnyń emdelgennen keıingi jaǵdaıyn oılaý jergilikti ákimdikterge júktelgen. Al oblysta dál osy ońaltý sharalaryna bólingen bıýdjet qarjysy birde jetpeı qalsa, birde tolyq ıgerilmeı otyr eken.
Máselen, jyl saıyn dert juqtyrǵan 91 adamnyń jaǵdaıyn jasaýǵa oblystyq bıýdjetten 99,1 mln teńge qarjy bólinedi eken. О́tken 9 aı aralyǵynda jergilikti áleýmettik qorǵaý qyzmetine 53,9 mln teńge bólingen. Bul – josparlanǵan qarajattyń 54,4 prosenti ǵana. Osy mardymsyz aqshanyń ózin tıisti maqsatqa jumsamaı otyrǵan aýdandar taǵy bar. Derek boıynsha, Kóksý aýdanyna bólingen 3,8 mln teńge qarjynyń 0,6 mln teńgesi, Uıǵyr aýdany boıynsha josparlanǵan 1,7 mln teńgeniń 0,4 mln teńgesi ıgerilse, Sarqan, Kerbulaq, Aqsý aýdandary men Tekeli qalasy boıynsha da jumsalǵan qarjy 50 prosentke de jetpeı otyr eken. Osy qatarda qurt aýrýy dendep turǵan Balqash, Raıymbek, Talǵar aýdandary men Taldyqorǵan qalasy da bar.