Semeı qalasynyń irgesinde burynǵy Jańasemeı aýdanyna qarasty Qurmanqoja degen aýyl bolǵan edi. Qazirde orny da joq sol qasıetti aýyldan halqymyzdyń maqtanyshyna aınalǵan nebir azamattar shyqqanyn bireý bilse, bireýdiń bilmeýi de múmkin.
Aıtalyq, Rım olımpıadasynyń kúmis júldegeri, shashasyna shań juqpas jelaıaq Ǵusman Qosanov, ataq-dańqy sheteldikterge deıin málim bolǵan akademık-matematık Tóleýbaı Amanov, biri respýblıkamyzdyń halyq ártisi, ekinshisi eńbek sińirgen ártis, jeztańdaı ánshiler Mádenıet Eshekeev pen Bolat Sybanov ta osy aýyldyń týmasy.
Búginde kózi tiri bolsa bulardyń sońǵysynyń 75 jyldyǵyn dúrkiretip toılap jatqan bolar edik. Al jan-jaqty talant ıesi atanǵan Bókeń oǵan ábden laıyq jan bolatyn. Alaıda, ókinishke qaraı aǵamyz osydan on bes jyl buryn, eli alpys jyldyǵyn endi toılaımyz dep daıyndalyp jatqanda, kenetten fánı dúnıeden baqı dúnıege attanyp kete bardy.
Iá, jan-jaqty talant ıesi demekshi, bala Bolat on jasynan ánshi atandy. On úsh jasynda Semeıge kelip, qala mektebinde oqıdy. Al, on alty-on jeti jasynda osyndaǵy Abaı atyndaǵy oblystyq drama teatryna akter bolyp jumysqa ornalasady. Munda qyzmet etken ondaǵan jyldar ishinde ondaǵan rólderde oınaıdy. Sonyń ishinde M.Áýezov, Ǵ.Músirepov, sondaı-aq shetel jáne orys klassıkteriniń dramalyq shyǵarmalarynda basty rólderdiń ıin qandyryp, sahnaǵa shyǵara bildi. Iаǵnı, óner súıer qaýymǵa eń aldymen talantty akter retinde tanyldy.
Bókeń teatr sahnasynda osylaısha talabyn ushtaı júrip, ánshilik ónerin de damyta túsýmen boldy. Sonyń aıǵaǵyndaı, Segiz seriniń ataqty «Aqbulaq», Áset Beıseýovtiń «Juldyzym» sekildi áýezdi ánderiniń Bókeńniń oryndaýynda juldyzy janǵanyn eshkim joqqa shyǵara qoımas. Sonymen birge, osy tusta onyń «Tań samaly», «Janym-aı», «Ǵashyqtar», «Jan ana», «Baqytym» sııaqty jáne basqa óz ánderi halyq arasynda keńinen taralyp ketti. Alpystan astam ánderiniń kóbiniń sózin ózi jazǵandyqtan Bókeńdi aqyn dep te esepteý kerek.
Mine, jýyrda osyndaı talant ıesiniń mereıtoıyna oraı, bir kezde ózi qyzmet istegen Abaı atyndaǵy teatrda ony eske alý keshi bolyp ótti. Onda talantty akter, tamasha ánshi, belgili sazger qaqynda mazmundy estelikter molynan aıtyldy. Al Nurıden Imanbaev, Gúlshat Erýova, Tursynǵazy Rahımov, Baqyt Úderbaeva sııaqty jáne basqa jergilikti ánshiler Bókeńniń áýezdi ánderin kelistire oryndap jatty.
Osy oraıda, Bókeńniń uly Qanat áke jolyn qýyp ánshiligimen jurtshylyq kóńilinen shyǵa bastaǵanyn aıtpasqa bolmaıdy. Sondaı-aq, Úmit jeńgemizge de halyq dán rıza. Osy kisiniń bas bolýymen Bókeńniń án kitaby jaryqqa shyqty, qaladaǵy bir úlken kóshege esimi berildi. Iá, halqy barda mundaı talanttardyń esimi eshqashan umytylmaıdy.
Dáýlet SEISENULY.
Semeı.