Oblys ákimi Memleket basshysyna aımaqtyń 2019 jylǵy áleýmettik-ekonomıkalyq damý qorytyndylary, sondaı-aq óńirdiń áleýetin odan ári nyǵaıtý jónindegi jospary týraly baıandady. Bul týraly Aqordanyń baspasóz qyzmeti habarlady.
Danıal Ahmetovtiń aıtýynsha, Shyǵys Qazaqstan oblysynda ınvestısııa kólemi artqan, ónerkásip jáne aýyl sharýashylyǵy óndirisiniń ósýi baıqalady.
Oblys ákimi Prezıdentke ataýly áleýmettik kómek berýdiń jańa formatyn iske asyrý barysy jaıynda málimet berdi. Qasym-Jomart Toqaev oblysta turatyn árbir az qamtylǵan otbasynyń jaǵdaıyna muqııat taldaý jasap, olarǵa kómek kórsetý jóninde tıisti sharalar qabyldaýdy tapsyrdy. Kóp balaly otbasylarǵa qatysty da osyndaı tapsyrma berildi.
Sonymen qatar Danıal Ahmetov Memleket basshysyna osy jyldyń ekinshi jartyjyldyǵynda Buqtyrma sý qoımasy arqyly ótetin kópirdiń qurylysy bastalatynyn habarlady. Prezıdent bul nysannyń áleýmettik turǵydan asa mańyzdy ekenin atap ótip, kópir qurylysy aımaq halqynyń edáýir bóligin jol taýqymetinen aryltatynyn aıtty.
Qasym-Jomart Toqaev Danıal Ahmetovke Abaıdyń 175 jyldyǵyn ótkizýge, sonyń ishinde, Jıdebaıdaǵy murajaı men qonaq úı kesheniniń qurylysyna qatysty birqatar naqty tapsyrma berdi.
Memleket basshysy ákimniń óńirdi áleýmettik-ekonomıkalyq damytý jónindegi jumysyna oń baǵa berip, Shyǵys Qazaqstan oblysynyń ǵylym-bilim jáne medısınalyq áleýetin arttyrýǵa baǵyttalǵan bastamalaryn atap ótti.