Japonııa úkimeti Aqmola oblysyndaǵy Esil aýdandyq aýrýhanasyna halyqaralyq «Shóp tamyrlary» baǵdarlamasy boıynsha grant bóletin boldy. Sonyń arqasynda medısına jabdyqtaryn jańǵyrtý jáne mekemeniń materıaldyq-tehnıkalyq bazasyn nyǵaıtý jobalary boıynsha 31 mıllıon teńgeden astam qarjy esildikter ıgiligine jaratylmaq.
Jańa jabdyqtar aldaǵy tamyz-qyrkúıek aılarynda jetkiziledi dep kútilýde. Asa qajet quraldardyń ishinde qannyń bıohımııalyq saraptamasyn jedeldetetin koagýlomtrler, KFK-5 fotometri, tis emdeý jabdyqtary, «LOR-kombaındar», sáýle shashyratqysh shamdar, elektrokardıogramma monıtorıngi, perzenthana ámbebap kereýet-transformeri, taǵy basqalary bar. Mamandar bul jabdyqtar aýdan turǵyndaryna medısınalyq kómek kórsetýdiń sapasyn arttyratynyn aıtyp otyr.
«Shóp tamyrlary» qaıtarymsyz baǵdarlamasy Qazaqstanda 1997 jyldan bastap júzege asyrylyp keledi. Ol shaǵyn aýqymdaǵy áleýmettik jobalardy qoldaýdy kózdeıdi jáne qarapaıym halyqtyń qaýipsizdigin qamtamasyz etýdi maqsat sanaıdy.
Baqbergen AMALBEK,
«Egemen Qazaqstan».
Aqmola oblysy,
Esil aýdany.