Qazirgi kúnderi álemde uıaly telefondardyń zarıadtaǵysh qondyrǵylary urǵan toqtan zardap shegýshiler qatary kóbeıip keledi. Sondyqtan búgin Amerıkanyń «Apple» kompanııasy óz tutynýshylarynan zarıadtaǵysh quraldyń tek túpnusqasyn ǵana qoldanýlaryn surap, málimdeme jasady. Bul týraly ITAR-TASS habarlap otyr.
Kompanııa «iPhone» uıaly telefonyna qatysty Qytaıda oryn alǵan oqıǵalarǵa ózindik tergeý jumystaryn júrgizip shyqty.
Shildeniń ortasynda Qytaı turǵyny óziniń «iPhone» uıaly telefonyn zarıadtamaq bolǵan kezde toqqa túsken. Oqıǵa ornyna jetken dárigerler onyń júregi toqtaǵanyn anyqtaǵan. Abyroı bolǵanda, medıkter 30 jasar jigittiń ómirin saqtap qala aldy. Mamandardyń anyqtaǵanyndaı, zarıadtaǵysh qural túpnusqa bolmaı shyqqan, oǵan qosa, ol eki jyldaı ýaqyt qoldanylyp kelgen.
Ekinshi oqıǵa Qytaıdyń soltústik-batysynda oryn alǵan. Bul joly 23 jasar stıýardessa toqqa jalǵanyp turǵan telefonmen sóılesý kezinde qaza tapqan.
Kompanııa málimetinde tutynýshylardyń túpnusqany jasandy taýardan ajyrata bilýleri úshin zarıadtaǵysh quraldyń tolyq sıpattamalary men belgileri jazylǵan. «Tutynýshylarymyzdyń qaýipsizdigi biz úshin óte mańyzdy. Biz olardy zarıadtaǵysh quraldyń tek túpnusqasyn ǵana qoldanýymen qatar, taýardy korporasııanyń arnaı dúkenderinen ǵana satyp alýǵa shaqyramyz», – dep jazyldy málimdemede.
Aıdar О́risbaev.