Jeńistiń 75 jyldyǵyna oraı elimizdiń barlyq óńirlerinde túrli estafetalar jalǵasýda. Osy aıtýly data aıasynda úshinshi megapolıstegi Dańq alleıasynda Shymkent garnızony Almaty qalasynan dańqty panfılovshylar dıvızııasynyń jaýyngerlik týynyń kóshirmesin saltanatty túrde qabyldap aldy. Tý kóshirmesin Qazaqstan áskerı-tarıhı mýzeıiniń Almaty qalasyndaǵy fılıaly usynyp otyr.
Bul taǵzym estafetasy 5 aqpan men 5 mamyr aralyǵynda elimizdiń barlyq óńirinde jalǵasady. Ol 2018 jylǵy 28 qyrkúıekte Dýshanbe qalasynda ótken TMD Memleket basshylary Keńesiniń sheshimimen bekitilgen Jeńistiń 75 jyldyǵyn merekeleýge baǵyttalǵan negizgi is-sharalar jospary aıasynda ótkizilmek.
Taǵzym estafetasy soǵysta Otanyn janqııarlyqpen qorǵaǵan qazaqstandyq jaýyngerlerdiń erligine qurmet kórsetý, esimderin el esinde saqtaý maqsatynda uıymdastyrylǵan.
Eske alýǵa jınalǵandar Máńgilik alaý keshenine gúl shoqtaryn qoıyp, bir mınýt únsizdik jarııalady. Jıyn barysynda Qazaqstan Ulttyq ulany ońtústik óńirlik qolbasshysynyń orynbasary, polkovnık Nııaztaı Alpeshov pen Shymkent qalasy ákiminiń orynbasary Nursadyq Ergeshbek, soǵys jáne eńbek ardagerleri sóz sóıledi.
Estafetaǵa polısııa, tótenshe jaǵdaılar, qylmystyq-atqarý júıesi departamenti, Ulttyq ulannyń óńirlik qolbasshylyqtary, áskerı bólimderi men bólinisteri, IIO men UU ardagerler uıymy, sondaı-aq orta mektep oqýshylary men áskerı-patrıottyq klýbtardyń tárbıelenýshileri, stýdent jastar, quqyqtyq tártip áskeriniń áskerı bólimderi ornalasqan qalalardaǵy jergilikti qoǵamdyq uıymdardyń ókilderi qatysty.
Jaýyngerlik týdy tabystaý saltanatynan soń «Túrkistan» saraıynda «Qazaqstandyqtardyń Uly Otan soǵysyndaǵy Jeńiske qosqan úlesi týraly» atty fılm kórsetildi. Batyr babalardyń erlik isteri beınelengen týyndy kórermenniń kóńilinen shyǵyp, jaqsy baǵasyna ıe boldy.
ShYMKENT