Gazet oqyrmandaryna jyldyń alǵashqy aıyndaǵy sheteldik kitap naryǵyndaǵy ádebı jańalyqtardy usynamyz. Túrli janrdaǵy jańa shyǵarmalar álemniń ár buryshyndaǵy san taqyrypty qaýzaıdy. Sózimizdiń álqıssasyn Mýrakamıdiń jazýshylyq ómirbaıany jazylǵan kitaptan bastaýdy jón kórdik.
Harýkı Mýrakamıdiń óz tvorchestvosyna arnalǵan sý jańa kitaby «Eksmo» baspasynan jaryq kórdi. Tanymal japondyq jazýshy shyǵarmashylyq jolynda ózi týraly alǵash ret áńgimelep berdi.
Ár kitaby satylymǵa shyqpaı turyp-aq bestsellerge aınalǵan avtordyń bul roman-ıntervıýi sheteldik oqyrmandardyń, ásirese jazýshylyqqa óte-móte qyzyǵýshylyǵy bar qaýymnyń aýzyna iligip, nazaryn aýdardy.
Mýrakamı ózin tanýǵa hám tabýǵa biraz jyldaryn arnaǵan adam. Ádebıetke bet burmas buryn dúkende satýshy bolyp, tipti jekemenshik mýzykalyq bar ashqan. Degenmen, taǵdyry jazýǵa buıyrtqan avtor búginde oqylymdy. «Jazýshy mamandyq retinde» kitabynda ol oqyrmandarǵa «ataqty Mýrakamıge» jetýdegi oqıǵalarymen, jazý mashyǵy hám jazýdan qoryqpaý kerektigi haqynda egjeı-tegjeıli baıandaıdy.
Kevın Kvan, «Asa baı qytaı qyzy» («Bezýmno bogataıa kıtaıskaıa devýshka»)
«Asa baı azıattar» («Bezýmno bogatye azıaty») atty qyzyq romannyń jalǵasy retinde avtor oqyrmandaryn azııalyq elıtanyń jabyq álemimen, olardyń ózgeshe ómir súrý erejelerimen, glamýrly sharalarymen, naǵyz baılarǵa tán qylyqtarymen tanystyrady. Sondaı-aq ol álemge ený úshin óte baı bolý jetkiliksiz, shyqqan tegińniń de aqsúıek bolýy óte-móte mańyzdy deıdi avtor.
Kler Fýller, «Ashy apelsın» («Gorkıı apelsın»)
Aýyr naýqasqa shaldyqqan anasyn baǵyp-qaǵyp júrgen bas keıipker tuıyqtyǵy men ózine senimsizdiginen ómiriniń kóp bóligin úıinde ótkizgen. Ol anasy ómirden ótken soń kóne aǵylshyn sharýalyǵyna jumysqa turyp, jaqsy qojaıyndarymen tanysqan soń, boıyna sińgen buıyǵy minezderden arylyp, ómirge erek kózqaraspen qaraı bastaıdy.
Olga Tokarchýk, «Sońǵy oqıǵalar» («Poslednıe ıstorıı»)
Nobel syılyǵy laýreatynyń 16 jyl buryn jazǵan úsh povesi ólim taqyrybyn qaýzaıdy. Bul polıak jazýshysy «1990 jyldardaǵy prozanyń basty úmitteriniń biri» edi. О́zine ǵana tán jazý mashyǵymen ólimdi ómir súrýdiń bir túri retinde sıpattaıtyn Olga Tokarchýk oqyrmanǵa ólim týraly áńgimeden qashpaýǵa hám ol joqtaı keıip tanytpaý kerek ekenin jetkizedi.
Tonı Morrıson, «Eń tunyq kózder» («Samye golýbye glaza»)
Taǵy bir Nobel syılyǵynyń laýreaty – tanymal qara násildi avtor ary taptalǵan afroamerıkalyq qyzdyń qaıǵyǵa toly, qatygez taǵdyry týraly povesti usynady. Ol úshin kógildir kóz – qol jetpes «aq» álemniń sımvoly ispetti. Eger ol ózin erkin sezinse, ómiri jaqsarar edi. 1970 jyly jazylǵan kitap óziniń kókeıkestiligin áli de joǵaltqan joq: ótkir taqyrybyna bola oǵan keıbir amerıkalyq mektepterde oqýǵa tyıym salynǵan.
Sasha Fılıpenko, «Ostrogqa oralý» («Vozvrashenıe v Ostrog»)
Jas belarýs jazýshysynyń bul shyǵarmasynda oıdan shyǵarylǵan dáneńe joq: jalǵyz qala túzýshi basty mekemesi túrme bolyp tabylatyn, tym artta qalǵan qalashyqqa astanadan tergeýshi kelip, Balalar úıiniń tárbıelenýshilerine ózine qol salý epıdemııasy qaıdan tap bolǵanyn anyqtaýǵa tyrysady.
Arı Týrýnen, «Iesin tappaǵan eskertkishter. Dańqqa laıyq emes bıleýshiler» («Pamıatnıkı ne tem. Pravıtelı, ne zaslýjıvshıe slavy»)
«О́rkókirektik, menmendik pen kórseqyzarlyqtyń álemdik tarıhynyń» avtory kezekti zertteý jasaı otyryp, oqyrmandarǵa uly bıleýshilerdiń ómirin basqa qyrynan kórsetedi. Sebebi Aleksandr Makedonskıı, Vladımır Lenın, Vasko da Gama, Ivan Groznyı, Martın Lıýter jáne basqa da uly tulǵalar qarama-qaıshylyqqa toly áreketterge barǵan. Al kórshiles elderde olardy kóbine qylmysker sanaǵan.
Krıstofer Baklı, «Sottardyń sońyna túsken jan» («Ohotnık za sýdıamı»)
Úlken Djordj Býshtyń spıchraıteri, tanymal «Munda temeki shegedi» romanynyń avtory usynǵan bul tarıhı romanda onyń áıgili ıýmory keńinen kórinis tapqan. Kúlkili, oıly hám «Providence Journal» jazǵandaı, «jeńiltek» kitap oqyrman nazaryn aýdarady dep kútilýde.