Baıanaýyl aýdany ákimdiginiń málimetinshe, bıyl 13 aýyldyq aýmaqta 51 eseptik kezdesý ótip, barlyǵy 65 usynys pen eskertý aıtylǵan.
Bular-aýyldarǵa ınternet jelisi, baılanys júıesin tartý, taza aýyz sý, joldardy salý jáne jóndeý, bilim, mádenıet, densaýlyq saqtaý nysandaryn salý, jóndeý, kóriktendirý, sanıtarlyq jáne ekologııalyq jaǵdaı máseleleri.
Byltyr 86 qabyldaý ótkizilip, 301 turǵynaýyl máselelerin aıtýǵa kelgen. Ataýly áleýmettik kómek alý, jer máselesi jáne jumysqa ornalasý, turǵyn úı sekildi máselelerdi arqaý etken 178 suraq túsindirilgen. Al, 123 másele oń sheshilgen.
Aýdandaǵy ataýly áleýmettik kómek alatyn az qamtylǵan 130 otbasynda 1-den 6 jasqa deıingi 128 bala bar.
Úkimet tarapynan arnaıy áleýmettik paket beriledi. Ol boıynsha azyq-túlik jıyntyǵy aıyna bir ret, turmystyq hımııa zattary toqsanyna bir ret beriledi. Áleýmettik paket ár balaǵa jeke-jeke usynylady.
Az qamtamasyz etilgen, kóp balaly otbasylarǵa kórsetiletin kómektiń bir túri – taza aýyz sý qubyryn úıge deıin tegin tartyp berý.
Maıqaıyń kenti men Baıanaýyl aýylynda kóp balaly 12 otbasyǵa jaldamaly páter berildi. Kóp balaly 1 otbasy «Dıplommen – aýylǵa!» baǵdarlamasymen aýdan ortalyǵynda baspanaǵa ıe boldy.
Kóp balaly az qamtylǵan 2 otbasyǵa Birlik jáne Kúrkeli aýylynan jergilikti bıýdjet esebinen jalpy 6 mıllıon teńgege turǵyn úı satyp alyndy. Memlekettik «Baqytty otbasy» baǵdarlamasy boıynsha 7 otbasy baspanaly boldy. «Baqytty otbasy» baǵdarlamasyna qujattar jınaý bıyl da jalǵaspaq. Aýdanda baǵdarlama arqyly baspanaly bolýǵa nıetti 50 otbasy ótinish bergen eken.
Aýdandyq ákimdik pen merdiger «KazStroıServıs7» JShS men aradaǵy kelisim boıynsha, 59 az qamtamasyz etilgen, kóp balaly, múmkindigi shekteýli jáne aýdannyń Qurmetti azamattarynyń úılerine sý qubyryn tegin tartý kózdelgen. Qazirgi ýaqytta 10 úıge sý qubyry tegin engizildi.
Aýdan boıynsha 22 kóp balaly, az qamtamasyz etilgen otbasylaryna baspana berilgen.
Bıylǵy oqý jylynda balabaqshalar men shaǵyn ortalyqtarǵa 132 bala tegin qabyldanypty. Aýdandaǵy 26 mekteptegi 2804 oqýshy tegin tamaqtanady.