Shymkentte júrgizýshige jala japqan jol polısııasynyń qyzmetkeri 4 jylǵa sottaldy. Bul týraly otyrar.kz habarlady.
Is Ál-Farabı aýdandyq sotynda qaraldy. Tártip saqshysynyń abyroıyna daq túsiretin osy keleńsizdik Elbasynyń quqyq qorǵaýshylarmen bolǵan kezdesýinde de aıtylǵan. Sol kezde Prezıdent «polıseıler qoldaryna qyzyl kýálik túskennen keıin ózin patsha retinde sezinedi» dep synaǵan edi. Tipti, shymkenttik páleqor jol polıseıiniń ózine-ózi uıymdastyrǵan shabýyly da sóz boldy.
Oqıǵa jol polıseıleriniń kezekti reıdi kezinde oryn alǵan. Tártip saqshysy men júrgizýshi arasynda daý týyndaıdy. Jol saqshysy kólik júrgizýshisiniń tártipke baǵynbaǵanymen qoımaı, pogonymdy julyp aldy dep jarııaǵa jar salǵan bolatyn.
Biraq bul arzanqol qoıylym bolyp shyqty. Aıtylǵannyń bári polısııa qyzmetkeriniń qarapaıym turǵynǵa japqan jalasy ekeni dálelin tapty. Shyn máninde oqıǵanyń qalaı órbigeni sol mańdaǵy aqsha aıyrbastaý ornyndaǵy syrtqy beıne-baqylaý kamerasyna jazylyp qalǵan. Osyǵan oraı aıyptaýshy tarap ta óz talabyn bildirdi.
Osylaısha júrgizýshi emes, polıseıdiń ústinen is qozǵaldy. Júrgizýshiniń kinásizdigin prokýratýra qyzmetkeri resmı túrde jarııalady. Osy daý týyndaǵan kezde polıseıdiń qasynda taǵy bir áriptesi bolǵan. Ol áli kúnge deıin izdestirilýde. Al Mamedov qylmystyq kodekstiń úsh baby boıynsha aıypty dep tanyldy.
Osylaısha, qarapaıym halyqtyń qorǵaýshysy emes, qorlaýshysyndaı bolǵan Mamedov temir torǵa 4 jylǵa qamalatyn boldy. Úkim oqylǵan kúnnen bastap 15 táýlik ótkennen keıin zańdy kúshine enedi.
Qurysh Nurymbet.