Sońǵy úsh jylda Qazaqstanda kásipkerlik salasyndaǵy zańsyz tekseristerdiń kólemi 970 faktini qurap, 351 laýazymdy tulǵa jaýapkershilikke tartyldy. Bul týraly Sybaılas jemqorlyqqa qarsy is-qımyl jónindegi kásipkerlerdiń IV respýblıkalyq forýmynda Sybaılas jemqorlyqqa qarsy is-qımyl agenttiginiń tóraǵasy Alık Shpekbaev aıtty.
Vedomstvo basshysynyń aıtýynsha, para berý deregi memlekettik jáne kvazımemlekettik organdardan bólek, jekemenshik sektorda da keń óris alǵan. Máselen, jekelegen kommersııalyq bankterde bıznesti damytý úshin nesıeni alýdyń kóleńkeli amaldary jolǵa qoıylypty. Buǵan qosa tabıǵı monopolııalar salasynda da jemqorlyq faktisi azaımaı tur. Ásirese bul elektr jelilerine qosylý, gaz, jylý, sondaı-aq sýmen jabdyqtaý máselesinde ózekti deıdi A. Shpekbaev. Agenttik tóraǵasy óndiris jáne ken ıgerý ónerkásibinde sybaılas jemqorlyq ádetti qubylysqa aınalǵanyn jetkizdi. Tipti rıteıl baǵytynda jyldar boıy ábden pysyqtalǵan zańsyz júıeler qalyptasqan dedi ol.
– Investorlardyń 600-den astam qordalanǵan máselesi sheshildi. Bıznestiń múddesin qorǵaýdan bólek, kásipkerlerdiń de ádebin ózgertý boıynsha jumystar atqarylýda. Kásipti júrgizýde ádeptilik basty murat bolýy tıis. Sybaılas jemqorlyqqa qarsy strategııany 2025 jylǵa deıin kezeń-kezeńmen iske asyrý jalǵastyrylady. Bıyl sybaılas jemqorlyq uǵymyn jeke sektorda túsindirý jumystary kúsheıtiledi, – dedi A.Shpekbaev.
Agenttik basshysy «QazAgro» holdınginiń enshiles kompanııasyna qatysty tergeý júrip jatqanyn aıtty. Anyqtalǵandaı, «QazAgroǵa» qarasty «Agrarlyq nesıe korporasııasy» AQ basshylyǵy zańsyz syıaqyǵa arnalǵan 11 mlrd teńgeni «Hoým kredıt bankiniń» depozıtine salǵan. Áıtse de bul aqshanyń negizgi maqsaty aýyldaǵy kásipkerlikti jeńildikpen nesıeleýge arnalǵan eken. Degenmen, spıker tergeý jumystary endi bastalǵanyn naqtylady. Budan ózge kásipkerler quryltaıynda bıznesti sıfrlandyrý, kásipkerlik saladaǵy salyq júıesin avtomattandyrýǵa qatysty ózekti máseleler qaýzaldy.