Osy másele tóńireginde tártiptik keńes músheleri qupııa qaltarysy kóp shytyrman oqıǵaǵa kezikkendeı boldy.
Memlekettik qyzmet isteri agenttigi oblystyq departamentiniń jańadan taǵaıyndalǵan basshysy Murat Qadyrbektiń tóraǵalyǵymen ótken tártiptik keńestiń kezekti otyrysynda alty másele qaralsa, beseýi memlekettik qyzmetshilerge qatysty tártiptik ister bolyp shyqty. Soǵan qaraǵanda, Ar-namys kodeksi talaptaryn óreskel burmalaıtyn sheneýnikter qatary azaıýdyń ornyna kóbeıip bara ma dep oılap qalasyń.
Osy másele tóńireginde tártiptik keńes músheleri qupııa qaltarysy kóp shytyrman oqıǵaǵa kezikkendeı boldy.
Memlekettik qyzmet isteri agenttigi oblystyq departamentiniń jańadan taǵaıyndalǵan basshysy Murat Qadyrbektiń tóraǵalyǵymen ótken tártiptik keńestiń kezekti otyrysynda alty másele qaralsa, beseýi memlekettik qyzmetshilerge qatysty tártiptik ister bolyp shyqty. Soǵan qaraǵanda, Ar-namys kodeksi talaptaryn óreskel burmalaıtyn sheneýnikter qatary azaıýdyń ornyna kóbeıip bara ma dep oılap qalasyń. Ǵ.Músirepov aýdandyq soty qurylysy aıaqtalǵan turǵyn úıdi paıdalanýǵa qabyldaý týraly jalǵan akt resimdep, tirkeýden ótkizgen qurylys bóliminiń basshysy M.Shámshetovtiń áreketin múliktiń zańdy ıesiniń talabymen zańsyz dep tapqan. Ol osy qylyǵyna oraı laıyqty jazasyn alýy kerek edi. Biraq tártiptik jaza qoldaný merziminiń ótip ketýine baılanysty talqylaýmen shektelip, jazadan aman qaldy. Al sottyń jeke uıǵarymyna jaýapty ýaqytyly berýdiń ornyna baqandaı 6 aıǵa deıin sozbalaqtap júrip alǵany úshin aýdan ákiminiń keńesshisi Ánýar Álimǵojınge eskertý jarııalaý usynyldy. Aýdan ákiminiń orynbasary Nıkolaı Masedonnyń tártiptik isi talqylaýmen aıaqtaldy.
Ekonomıkalyq qylmysqa jáne sybaılas jemqorlyqqa qarsy kúres departamentiniń usynymyna sáıkes Petropavl qalasy boıynsha salyq basqarmasynyń bas mamany Jandos Nurǵalıevqa qatysty másele qaralǵanda talqylaý qyzyp sala berdi. Tıisti organnyń materıaldary boıynsha ol óz ókilettigin asyra paıdalaný arqyly materıaldyq jaǵdaıyn jaqsartýdy kózdegen. Jeke kásipker Poedınokke jer salyǵyna qosylǵan 170 myń teńge aıyppul tóleý kómegin usynyp, jeke kóliginiń jóndeý jumystaryna 30 myń teńge talap etken. Alaıda, kúdiktiniń kinásin dáleldeý qıynǵa túsken tárizdi. Sol sebepti qylmystyq isti qysqartýǵa týra kelgen. Ol da «kásipkerdiń aıyppuldy óteýge qarajaty jetpegendikten, qaryzben qaraılasyp edim. Keıin almaqqa árekettendim. Tıisti oryndarǵa aryzdanatynyn bilgen joqpyn», dep qansha aqtalýǵa tyrysqanymen, eshkimdi ılandyra almady. Tanymaıtyn, bilmeıtin adamnyń qolyna qomaqty aqshany ustata salýy tártiptik keńes múshelerin qatty tańdandyrǵan sekildi. 30 myń teńge qaryz ba, álde para ma degen suraq sheshýsiz qaldy. Bas mamanyń bul áreketi sybaılas jemqorlyqqa jaǵdaı týdyrýshylyq retinde baǵalanyp, qyzmetten shettetý týraly usynys biraýyzdan qabyldandy.
Tártiptik keńes músheleri Aqjar aýdanyna qarasty Talshyq orta mektebiniń dırektory Samal Bekbaevany qyzmetinen bosatý týraly uıǵarym jasady. Onyń zań talaptaryn óreskel buza otyryp, mádenıet úıinde ádistemeshi qyzmetin atqaratyn A. Aýǵanbaeva degen tanysyn orys tili jáne ádebıeti páni muǵalimdigine qabyldaǵany, 89 sabaqtyń jartysyna jýyǵyn ótkizbese de, tolyq jalaqy tólengeni pedagog degen qasıetti atqa jarasyp turǵan joq.
Oblystyq qarjylyq baqylaý ınspeksııasy M.Jumabaev aýdany turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń bir top qyzmetkeriniń memlekettik satyp alý týraly zańnamasyn óreskel buzyp, beımálim kásipker avtomobıl joldaryn kútip ustaý jónindegi konkýrs jeńimpazy bolyp shyǵa kelgenin áshkerelegen. Onyń sybaılas jemqorlyqqa jaǵdaı týdyratyn quqyq buzýshylyq belgi bar degen usynysy qoldaý taýyp, tıisti shara qoldaný úshin isti prokýratýraǵa joldaýǵa sheshim alyndy.
О́mir ESQALI,
«Egemen Qazaqstan».
Soltústik Qazaqstan oblysy.