Jambyl oblysy aýyl sharýashylyǵy salasyna qolaıly aımaq bolǵanymen, búginde turǵyndarǵa qajetti kóptegen ónimdi ózge óńirlerden tasymaldap keledi. Oblys ortalyǵyndaǵy «Aýyl-Bereke» bazarynda saýdalanyp jatqan birqatar ónim jergilikti emes. Bul rette saýdagerler ózge óńirdiń ónimderine suranystyń joǵary ekenin aıtady.
Ishki naryqta Pavlodar, Qaraǵandy oblystary men kórshi Qyrǵyzstan memleketiniń úlesi báribir joǵary eken. Máselen, Pavlodar kartobyn uzaq saqtaýǵa bolady deıdi olar. Qyrǵyzstan kartoby da solaı. Al Pavlodardan kelgen sábizdiń túsi de, dámi de bólek desedi. Sondyqtan da atalǵan óńirlerden keletin ónimge degen halyqtyń suranysy joǵary. Osy másele tóńireginde Jambyl oblysynyń ákimi Berdibek Saparbaev esepti kezdesýinde «Basqa óńirlerden keletin azyq-túlikti azaıtý kerek. Jeksenbi kúni bazarda boldym. Pııazdan basqa Jambyl óńirinde ósirilgen ónim joq. Bári syrttan keledi. Pavlodardan kartop alatyn bolsaq, onda ne bolǵanymyz?», degen edi. Endi bul birden sheshilip ketpese de, birtindep sheshilýi tıis máselelerdiń biri. Alaıda buǵan oblystyń áleýeti jete me, búgingi tańdaǵy ónim kórsetkishi qandaı degen máselege toqtalyp kóreıik.
О́tken jyldyń qorytyndysy boıynsha, Jambyl oblysy pııaz ósirýden aldyńǵy orynǵa shyqty. Oblystyq aýyl sharýashylyǵy basqarmasynyń málimetinshe, ótken jyly óńirde 20 095 gektar jerge pııaz egilip, odan ortasha eseppen 803 myń tonna ónim jınalǵan. Al osy egilgen pııazdyń 19 294 gektary agroqurylymdarǵa tıesili bolsa, 801 gektary sharýashylyqtarda ósirilgen. Pııaz ósirýden qazir Shý, Qordaı jáne Jambyl aýdandary kósh bastap tur. Qordaı aýdanyndaǵy Masanchı, Sortóbe jáne Jambyl aýdanyndaǵy Jalpaqtóbe (burynǵy Dýnganovka) aýylynda turatyndar pııaz egýmen jyl saıyn ári turaqty túrde aınalysady.
Málimetke súıensek, óńirde ótken jyly 10,1 myń gektar alqapqa kartop, 3,6 myń gektarǵa sábiz jáne 1,4 myń gektarǵa qyryqqabat egilgen. Biraq bul kórsetkish pııazǵa qaraǵanda tómen. Degenmen, basqarma bergen málimet boıynsha oblystaǵy negizgi kókónis ónimderi ishki tutyný normasyn artyǵymen qamtıdy eken. Máselen, óńirde jylyna shamamen 234 myń tonna kartop óndiriledi. Bul ishki suranysty 2,2 ese artyǵymen qamtıdy. Sol sııaqty, óńirdegi qyryqqabat, kartop, sábiz sııaqty ónimder de dittegen mólsherde óndirilse, suranysty óz deńgeıinde qanaǵattandyrady.
Negizi jyl saıyn jeltoqsan men qańtar aılarynyń aralyǵynda, iri bazarlarda kókónis saýdasy qala turǵyndarynyń suranysyna saı júrgiziledi eken. Jambyl oblystyq aýylsharýashylyq basqarmasynyń basshysy Berik Nyǵmashevtiń aıtýynsha, bul kezeńde Pavlodar, Qaraǵandy oblystarynyń jáne Qyrǵyzstan ónimderiniń úlesi artady. Al aýyl turǵyndarynyń suranysy kúz mezgilinde jınaqtalǵan qosalqy sharýashylyqtaǵy jergilikti qor esebinen qamtylady. «Syrttan keletin kókónistiń ishki naryqtaǵy úlesi jergilikti turǵyndardyń taǵamdyq suranys ereksheligine de baılanysty. Onyń aıyrmashylyǵy – Pavlodar men qyrǵyz kartobynyń syrtqy pishininiń tartymdylyǵy men saqtaýdaǵy tózimdiliginde bolsa, Pavlodardyń sábizi túsimen jáne dámimen erekshelenedi. Oblysta 1 127,3 myń tonna kókónis óndirilse, ishki tutyný normasy 197,8 myń tonna. Al syrtqa 929,4 myń tonna ónim shyǵarylsa, naýryz-maýsym aılaryndaǵy táýeldilik 22,1 myń tonnany jáne óńirlermen ózara taýar almasý kólemi 66 myń tonnany quraıdy», deıdi Berik Nyǵmashev.
Jambyl oblysynyń birqatar aýmaǵyn kartop ónimimen qamtamasyz etip otyrǵan «Zylıha» sharýa qojalyǵynyń tóraǵasy Kerimqul Begalıev búginde sapaly tuqymnyń joqtyǵyn aıtady. Bul úshin sapaly tuqymdy taǵy da Pavlodar óńirinen ákelý kerek. Osy sııaqty keıbir máseleler óńirde ónim ónimdiligin arttyrýǵa, jalpy halyqtyń suranysyn qanaǵattandyrýǵa kedergi keltirýde. Áıtpese, «Alystan arbalaǵansha, jaqynnan dorbala» degendeı, sonaý qıyrdaǵy soltústikten emes, kartop jáne sábiz ónimderiniń jergilikti jerde jetkilikti óndirilgeni de ekonomıkanyń odan ári damyp, jetilýine jaǵdaı jasaıtyn edi...
Jambyl oblysy