Qazirgi kúnderi Ońtústiktegi Qazyǵurt taýynyń eteginde túsirilimi jasalyp jatqan fılmniń aıtpaǵy osy. Kartına «Shalash» dep atalady. Qazaqsha «Lashyq» dep alsaq, bolatyn shyǵar.
Lentany «DS fılm» kınostýdııasy men «Amanat» prodıýserlik ortalyǵy túsirip jatyr. Onyń basty rólderinde Qyrǵyz óner ınstıtýtynyń stýdenti Zınat Qydyrmanova men T.Júrgenov atyndaǵy Qazaq ulttyq óner akademııasynyń stýdenti Almat Esim oınaıdy.
«Biz fılmde aýyldyń tirshiligin eshbir boıamasyz kórsetýge umtyldyq, - deıdi fılmniń ssenarısi ári rejısseri Kenjebek Shaıqaqov. - Qazyǵurt - óte bir kórikti óńir. Sondyqtan túsirilimdi osynda jasaǵandy jón kórdik. Oqıǵanyń negizine ómirde naqtyly bolǵan oqıǵa alynǵan. Bir jas jigit aýyldasynyń taýyǵyn urlap, shartty túrde sottalady. Osylaı masqaraǵa ushyraǵanyna tózbegen ol sosyn taý basyndaǵy shekara mańyndaǵy qyrǵyz aıylyna qashyp ketedi. Sonda baryp, sharýashylyqtyń malyn baǵady. Bir kúni osynda bir qyzben tanysyp qalady. Ekeýiniń ortasynan ot ushqyndap, aqyry úlken mahabbatqa aınalady. Ǵashyqtar kúnderdiń kúninde aıyl shetinen lashyq salyp alyp, birge turyp jatady. Olar ózderin sonyń ózinde jer betindege eń baqytty adamdar sezinedi».
Fılmniń ssenarıi osydan úshi jyl buryn «Qazaqfılm» kınokompanııasy jarııalaǵan konkýrsta ozyp shyqqan kórinedi. Oǵan jazýshy Dýlat Isabekov, rejısser Satybaldy Narymbetov syndy tulǵalar jaqsy baǵa beripti.
«Biz endi kórermenniń de jaqsy baǵasyn alamyz degen úmittemiz», deıdi rejısser.
Murat Aıtqoja.