2020 jyldyń 2 aıy ishinde jalpy uzyndyǵy 682 shaqyrymdy quraıtyn 4 aqyly jol ýchaskesinen túsken qarajat 643,1 mln teńgeni qurady. Bul týraly Indýstrııa jáne ınfraqurylymdyq damý mınıstrliginiń baspasóz qyzmeti habarlady.
Onyń ishinde respýblıkalyq mańyzy bar «Nur-Sultan-Temirtaý» tasjolynan 215,5 mln teńge, «Nur-Sultan-Shýchınsk» tasjolynan 167 mln teńge, «Almaty-Qapshaǵaı» jolynan 140,1 mln teńge, «Almaty-Qorǵas» jolynan 120 mln teńge jınalǵan.
О́tken jyldyń qorytyndysynda aqyly jol ýchaskelerinen 5,4 mlrd teńgeni jınalǵanyn aıta ketý kerek. Onyń 3,8 mlrd teńgesi – aqyly joldardy kútip ustaý sharalaryna, 1,6 mlrd teńgesi – tólem alý júıesine qyzmet kórsetý sharalaryna jumsalǵan.
Eske sala keteıik, 2019 jyldyń jeltoqsanynda ınvestısııalyq konkýrstyń qorytyndylary boıynsha joldardyń 11 myń shaqyrymynda tólem alý júıesin ornatý jáne ony kútip ustaý týraly qujatqa qol qoıyldy. Kelisimge sáıkes bıyl rekonstrýksııadan ótken 5,7 myń shaqyrymdyq jol ýchaskelerinde tólem alý júıesi ornatylady dep josparlanyp otyr. Joldardyń qalǵan 5,3 myń shaqyrymy 2024 jylǵa deıin rekonstrýksııalaý sharalarynyń aıaqtalý merzimine baılanysty aqyly júıege kóshirilmek. Osylaısha, ol joldardyń kútimine bıýdjetten qarajat bólinbeıdi.