Nur-Sultanda Qazaqstan men Nıderland quramalary arasynda ótip jatqan Devıs kýbogynyń irikteý týrnıriniń alǵashqy kezdesýinde Mıhaıl Kýkýshkın men Robın Hase sheberlik baıqasty.
Birinshi sette álemdik reıtıngte 92 orynda turǵan Kýkýshkın 4:6 esebimen utylǵanymen, ekinshisinde báseke taı-breıkke deıin jetti. Sheshýshi tusta shıraq qımyldaǵan jerlesimiz jeńisti qarsylasynyń ýysynan julyp áketti – 7:6. Biraq úshinshi sette ATR tiziminde 162 satyǵa jaıǵasqan nıderlandtyq tennısshi kózdegen maqsatyna qol jetkizdi – 6:3. Bul match týra bir jarym saǵatqa sozyldy.
Dáp qazir Qazaqstan men Nıderland arasyndaǵy matchtyń ekinshi kezdesýi ótýde. Kortta Aleksandr Býblık pen Tallon Grıkspýr kúsh synasýda.