Nur-Sultanda Qazaqstan men Nıderland quramalary arasynda ótip jatqan Devıs kýbogynyń irikteý týrnıriniń ekinshi kezdesýinde Aleksandr Býblık pen Tallon Grıkspýr kúsh synasty.
Álemdik reıtıngte 51 orynda turǵan elimizdiń birinshi raketkasy Aleksandr Býblık birinshi sette qarsylasyn ázer utty. Kezdesý taı-breıkke deıin ulasyp, 7:6 esebi tirkeldi. Ekinshi sette de dál sondaı jaǵdaı qaıtalandy. Qos tennısshi uzaq tiresti. Desek te jerlesimiz ATR tiziminde 196 satyǵa taban tirgen Tallon Grıkspýrge tize búktirdi – 7:6.
Sóıtip, Qazaqstan men Nıderlandy quramalary arasyndaǵy jarystyń alǵashqy kúni tarazy basy teńesti – 1:1. Erteń juptyq báseke jáne jekelegen qos saıys ótedi.