Ýkraına elshisin qabyldady

Keshe Memlekettik hatshy Marat Tájın Ýkraınanyń Qazaqstandaǵy Tótenshe jáne ókiletti elshisi Oleg Dıomındi onyń Qazaqstandaǵy dıplomatııalyq mıssııasynyń aıaqtalýyna oraı qabyldady.

Keshe Memlekettik hatshy Marat Tájın Ýkraınanyń Qazaqstandaǵy Tótenshe jáne ókiletti elshisi Oleg Dıomındi onyń Qazaqstandaǵy dıplomatııalyq mıssııasynyń aıaqtalýyna oraı qabyldady.

Memlekettik hatshy óz sózinde ekijaqty qarym-qatynastardyń tereńdeýine aıtarlyqtaı úles qosqany úshin ýkraın dıp­lomatyna rızashylyǵyn bil­dirdi. Osy rette M.Tájın Ýk­raınanyń EQYU-daǵy tór­aǵalyǵymen quttyqtaı otyryp, Astana deklarasııasynyń erejelerin, onyń ishinde Eýro­atlantıkalyq jáne Eýrazııa­lyq qoǵamdastyqtyń qaýip­sizdigin júzege asyrýǵa barynsha járdemdesýge Qazaq­stan­nyń daıyn ekenin jetkizdi. Mem­lekettik hatshy Ýkraına elshisin onyń Qytaı Halyq Res­pýblıkasyna elshilik qyzmetke ta­ǵaıyndalýymen quttyqtaı kelip, jańa jumysyna sáttilik tiledi.

Elimizde úsh jyl qatarynan elshilik qyzmet atqarǵan O.Demın eki el arasyndaǵy qarym-qatynastardyń damýynda Qazaqstan Prezıdentiniń qosqan úlesin erekshe ataı kelip, ýkraındyqtar N.Nazarbaevty «jaqyn adam» retinde tanıtyndyqtaryn da jetkizdi. Jáne elshi Qazaqstandaǵy qyzmeti barysynda saýda-ekonomıkalyq jáne má­denı-gýmanıtarlyq salalardaǵy ynty­maqtastyqty damytýda jemisti jumys­tar atqarylǵandyǵymen bólisti. Sondaı-aq, ol Qazaqstan men Ýkraı­na arasyndaǵy memleketaralyq qa­rym-qatynastardyń jańa deńgeıge kóte­rilgendigin erekshe atady.

Jalpy, Qazaqstan Ýkraınanyń saıası, ekonomıkalyq jáne gýmanıtarlyq bastamalaryna únemi qoldaý bildirip keledi. Eki eldiń ustanymdary barlyq baǵyttar boıynsha uqsas ekendigin de aıta ketken jón.

Ýkraınalyq elshi buqaralyq aqparat quraldary ókilderine bergen brıfınginde eki el arasyndaǵy yntymaqtastyq artyp kele jatqanyn jáne de ol únemi damý ústinde ekendigin basa atady. Elshiniń sózine qaraǵanda, Qazaqstan men Ýkraına arasyndaǵy taýar aınalymy sońǵy jyldary aıtar­lyqtaı ósken. Ýkraınalyq avto­kólikterdi Qazaqstanda shyǵarýǵa qa­tysty birlesken jobalar da júzege asa bastaǵan. Ushaq jasaý jáne ǵarysh salasy boıynsha da eki el arasyndaǵy yntymaqtastyq artýda.

Elshi qazaqstandyq kadrlardy Ýk­raı­nada daıarlaý barysyna da toq­taldy. Atap aıtqanda, qazaq­stan­dyq jastar Kıev tehnıkalyq ýnıversıtetiniń qo­sym­sha emtıhandaryn tapsyryp jatyr eken.

Budan bólek dıplomat Ýkraınanyń EQYU-daǵy tóraǵalyǵy Astana dek­la­ra­sııasynyń erejeleri rýhynda jal­ǵasaryn qýattaı kelip, osy eldiń Syrtqy ister mınıstri ári EQYU tóraǵasy ústimizdegi jyldyń qaza­nyn­da Astanaǵa sapar jasaıtynyn, sol kezde «Beıbitshilik úshin, qarý­syz­­da­ný úshin jáne ekonomıkalyq damý úshin» atty jalpyeýropalyq qoz­ǵa­lysty damytý barysy sóz bolatynyn alǵa tartty. Keden odaǵyna qatys­ty sózinde elshi bul Uıymǵa degen Ýkraı­nanyń ustanymy ońdy ekenin, uıym elderdiń bir-birin túsinýine jaqsy orta qalyptastyratynyn atady. Ýkraına Keden odaǵy men Eýropalyq Odaq arasyn jalǵaıtyn kópir bola alar edi, dedi elshi sózin qorytyndylaı kelip.

Asqar TURAPBAIULY,

«Egemen Qazaqstan».