Ǵafý Qaıyrbekovtiń shyǵarmashylyǵyna arnalǵan jyr keshi ótti
Týǵan jerine kim de bolsa qurmetpen qaraıdy. Alaıda, ony aqyn Ǵafý Qaıyrbekovteı alapat sezimmen súıe bilýdi jaratqan ıemiz ekiniń birine buıyrta bermegen tárizdi. Aqyn ǵajaıyp ólkesine degen perzenttik ińkárligin jibekti júziktiń kózinen ótkizgendeı bir aýyz sózge syıdyryp jiberedi. Sondaı óleńderiniń birinde:
Ǵafý Qaıyrbekovtiń shyǵarmashylyǵyna arnalǵan jyr keshi ótti
Týǵan jerine kim de bolsa qurmetpen qaraıdy. Alaıda, ony aqyn Ǵafý Qaıyrbekovteı alapat sezimmen súıe bilýdi jaratqan ıemiz ekiniń birine buıyrta bermegen tárizdi. Aqyn ǵajaıyp ólkesine degen perzenttik ińkárligin jibekti júziktiń kózinen ótkizgendeı bir aýyz sózge syıdyryp jiberedi. Sondaı óleńderiniń birinde:
«Qaıda júrsem, seni esimnen tastamaı,
О́tip ketti jaqsy jyl men jas talaı.
Meniń atym saǵynysh bop ózgerdi,
Saǵynyshqa qolyńdy ber, Qostanaı!»
deıdi. Qazir osy saǵynysh aqynnan oqyrmanyna, jerlesterine aýǵandaı. Aqyn men oqyrman arasyndaǵy osy uly sezim Ǵafý Qaıyrbekovti aramyzdan alyp ketken jıyrma jylǵa jýyq ýaqyttyń uzaqtyǵyn bildirmeıtindeı, moıyndatpaıtyndaı. Qostanaıda jaqynda ótken kesh qazaq poezııasynyń jaryq juldyzdarynyń biri Ǵafý Qaıyrbekovtiń týǵanyna 85 jyl tolýyna arnaldy. I.Omarov atyndaǵy oblystyq qazaq drama teatrynyń zalynda ıne shanshar jer tabylmady. Ǵafýdy saǵynǵan jurt orynnyń jetpegenine qaraǵan joq, keshti eki saǵat boıy tikesinen tik turyp tamashalady.
Keshte oblys ákimi Nuraly Sádýaqasov poezııa jáne basqa janrlarda jazylǵan qyryqshaqty kitaptyń avtory Ǵafý Qaıyrbekovti uly dala bergen kemeńgerlik pen danalyqtyń jalǵasy dep baǵalady. Ol qazaqy dástúrmen aqynnyń jary Bádesh apaıdyń ıyǵyna qamzol jaýyp, syı-sııapat jasady. Ákim aqynyn izdep, qurmettep jatqany qandaı ǵanıbet. Munan keıin Qazaqstan Jazýshylar odaǵy tóraǵasynyń orynbasary, belgili aqyn Ǵalym Jaılybaev aqynnyń shyǵarmashylyǵyna sholý jasaı kele qazaq poezııasynda Ǵafý mektebiniń qalyptasqandyǵyn, sodan dáris alyp, jyr tylsymyn túsingenniń biri ózi ekendigin jáne tutas bir urpaq sol mektepten tálim alǵandyǵyn aıtty. Ǵafýdyń qasynda júrip, onyń aǵalyq qamqorlyǵyn kórgen, ustaz tutqan Baıanǵalı Álimjanovtiń esteligi óte áserli shyqty. Baıanǵalı Ǵafýdyń aqyndyǵymen qatar aıtqyshtyq sheshendigine toqtaldy. Marjan sózdiń de, qulpyrǵan óleńniń de túp-tamyry aıqyn da, aıshyqty oı ekeninde sóz joq. Ǵafý osyndaı qasıetimen de erekshelenetin edi. Qazir tarıhymyzdy jańa kózqaraspen eksheý jóninde aıtylyp jatyr. Baıanǵalı táýelsizdiktiń alǵashqy jyldary Kenesary Qasymovtyń týǵanyna 190 jyl tolýy Kókshetaýda toılanǵanda oǵan Býrabaıda demalyp jatqan Ǵafýdyń qatysyp, sonda sóılegen sózinen mysal keltirdi.
Munan keıin qostanaılyq satırık jazýshy Ǵumar Ahmetchın aqyn aǵasynyń týǵan jerge jasaǵan saparlary jóninde ádemi estelikterge kezek berdi. Keshti qostanaılyq ánshi Talǵat Moldaǵalıev, teatr aktrısasy Shara Músilova, sazgerler Qalıbek Deripsaldın men Baqytjan Sáýekenov Ǵafýdyń óleńine jazylǵan ánderimen órnektep otyrdy. Qazaq drama teatrynyń akterleri Qabdilmájıt Imanov, Álimhan Myrzahan, Nurlybek Kenjeahmetov, Asylhan Kenjetaı, Qýanysh Qoıshyǵulov aqyn óleńderin náshine keltire oqydy. Keshti júrgizip otyrǵan aqyn Aqylbek Shaıahmet Ǵafý Qaıyrbekovtiń artynda qalǵan mol murasyn jınaqtap, rettep jeke kitaptar etip bastyryp, kóp tomdyǵyn shyǵarýǵa muryndyq bolyp júrgen aqynnyń jary Bádesh Hamzına-Qaıyrbekovanyń eńbegine toqtaldy. Osy keshke balalarymen birge kelgen Bádesh apaı aqynnyń oqyrmandary men jerlesterine, keshti ótkizýge muryndyq bolǵan oblys basshylaryna alǵysyn aıtty. Ǵafýdyń Qostanaıǵa, oqyrmandarynyń aqynǵa degen saǵynyshy Bádesh apaıdyń júreginde de eselenip ketkendeı eken. Jyrǵa toly, syrǵa toly keshte aqyn jarynyń kóńilin bosatqan da osy rııasyz saǵynysh bolatyn.
Qostanaılyqtar bul basqosýdan rýhanı toıyp, ósip tarady. Olar halqymyz, onyń qasıetti tili barda, Ǵafý barda mundaı syrly keshtiń úzilmesine de senimdi bara jatty.
Názıra JÁRIMBETOVA,
«Egemen Qazaqstan».
QOSTANAI.