Elimizde 7 qańtardan bastap «Qazaqstan Respýblıkasynyń keıbir zańnamalyq aktilerine turǵyn úı-kommýnaldyq sharýashylyq máseleleri boıynsha ózgerister men tolyqtyrýlar engizý týraly» Zań qoldanysqa endi. Zań sheńberinde qosymsha normatıvtik-quqyqtyq aktiler qabyldanady. Onyń ishinde turǵyn úıge qatysty 3 qaýly jáne 17 buıryq, jalpy sany 20 qujat daıyndyqta. Qujattar naýryz aıynyń sońyna deıin bekitiledi.
Páter ıeleri kooperatıvteriniń (PIK) ornyna qurylatyn Menshik ıeleriniń birlestigin (MIB) qurý boıynsha normatıvtik-quqyqtyq qujattar naýryz aıynyń sońyna deıin tolyq bekitiletin bolady. Primeminister.kz málimetterine súıensek, «Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ Metodologııa jáne óńirlik damý departamenti basshysynyń orynbasary M. Ábdikárimov: «Menshik ıeleriniń birlestigi – turǵyndardyń óz ishinen qurylatyn kommersııalyq emes uıym. Turǵyndar jınalysynda úsh jyl merzimge kóppáterli turǵyn úı keńesi jáne revızııalyq komıssııa saılanady, bir jyl merzimge birlestik tóraǵasy belgilenedi», - dep túsindirdi.
Onyń aıtýynsha, Zań kúshine engen kúnnen bastap bir jyl ishinde kóppáterli turǵyn úı ıeleri jınalys ótkizýleri tıis. Jınalysqa sol turǵyn úıdegi menshik ıeleriniń keminde 51 paıyzynyń qatysýy mindetti. Máselen, bir turǵyn úıde 100 páter bolsa, jınalysqa keminde 51 páter ıesi qatysýy kerek, al usynylǵan sheshimdi kemi 26 menshik ıesi (páter ıesi) qoldaýy tıis.
Birlestik tóraǵasy turǵyndardyń arasynan saılana alady. Oǵan jalaqy tólenedi. Tóraǵa birlestikti zańdy tulǵa retinde tirkeıdi, servıstik uıymdarmen kelisimshartqa otyrady. Jınalysta úı keńesi múshelerimen klınıng, santehnıkalyq jóndeý júrgizetin servıstik uıymdardy tartý, t.b. máseleler retteledi. Sonymen qatar birlestiktiń atynan esepshot ashylady. Aı saıyn servıstik uıymdar jumystaryn atqarǵan soń, akti boıynsha qarajat birlestiktiń atynan servıstik uıymǵa aýdarylady.
Menshik ıeleri birlestiginde páter ıeleriniń óz qarajatyn ózi basqara alý múmkindigi bar. Máselen, qazirgi ýaqytta qaramaǵynda 10, tipti 100-ge jýyq kóppáterli turǵyn úıi bar páter ıeleri kooperatıvteri jumys isteıdi. Bul jaǵdaıda, árıne, qarajat ortaq esepshotqa jınalady. Sáıkesinshe, turǵyndar qarajattyń qaıda jumsalyp jatqanyn bilmeýi de múmkin. Al menshik ıeleri birlestigi qurylǵan ýaqyttan bastap aı saıynǵy tólemder páter ıeleri kooperatıvterine emes, sol birlestiktiń esepshotyna aýdarylatyn bolady.
Eskere ketetin jaıt, qazir jumys istep jatqan páter ıeleri kooperatıvteri turǵyndardyń kóńilinen shyqqan bolsa, óz jumysyn jalǵastyrýǵa múmkindikteri bar. «Jańa Zańǵa sáıkes, olar páter ıeleri kooperatıvi retinde 2022 jyldyń 1 shildesine deıin ǵana jumys isteı alady. Al odan keıin qyzmetin jalǵastyrýy úshin basqarýshy kompanııa nemese servıstik uıym retinde qaıta qurylýy kerek» dep atap ótti M.Ábdikárimov.